İslamabadda İslam Konfransı Təşkilatı Xarici İşlər nazirlərinin 34-cü sessiyası işini yekunlaşdırmışdır

 

Sessiyanın sonuncu günü Azərbaycanla bağlı üç qətnamə

və İslamabad bəyannaməsi qəbul edilmişdir

 

Pakistanın paytaxtı İslamabadda İslam Konfransı Təşkilatı (İKT) Xarici İşlər Nazirlərinin 34-cü sessiyası mayın 17-də öz işinə yekun vurmuşdur.

Sülh və harmoniya mövzusuna həsr olunmuş toplantının sonunda Azərbaycanla bağlı üç qətnamə layihəsi qəbul edilmişdir. Bunlar Ermənistanın Azərbaycana təcavüzünü, işğal olunmuş torpaqlarımızda tarixi, mədəni abidələrin dağıdılmasını pisləyən və iqtisadi sahəni əhatə edən qətnamələrdir. İlk dəfə olaraq beynəlxalq təşkilatın qəbul etdiyi qətnamədə 1992-ci ildə erməni silahlı qüvvələri tərəfindən törədilmiş Xocalı faciəsinə siyasi qiymət verilmiş və dinc azərbaycanlı əhalisinin qətlə yetirilməsi kütləvi qırğın, soyqırımı kimi qiymətləndirilmişdir.

Görüşün yekununda qəbul olunmuş İslamabad Bəyannaməsində də Ermənistanın Azərbaycan torpaqlarını işğal etməsini pisləyən müddəa öz əksini tapmışdır. Sənəddə Ermənistandan işğal etdiyi Azərbaycan torpaqlarını qeyd-şərtsiz azad etməsi tələb olunur.

 

Respublika.- 2007.- 18 may.- S. 4.