Qocayeva A.

Mədəniyyətimizin intibah dövrü

Mədəniyyət və incəsənət xalqları, millətləri yaxınlaşdıran, onların bir-birini sözsüz başa düşməsinə yardımçı olan əvəzsiz ünsiyyət vasitəsidir. Azərbaycan mədəniyyəti və incəsənəti öz qədimliyinə, zənginliyinə və milli köklərimizlə sıx bağlılığına görə diqqəti cəlb edir. Xüsusilə, XX əsrdə ölkə mədəniyyəti özünün intibah dövrünə qədəm qoyaraq dünya arenasına çıxmışdır. Mədəniyyət və incəsənətimizin bugünkü səviyyəyə gəlib çatmasında, dünya xalqları tərəfindən tanınaraq sevilməsində onun himayədarı, qayğıkeşi, görkəmli dövlət xadimi Heydər Əliyevin xidmətləri olduqca böyükdür. Heydər Əliyev bir sıra görüşlərdə, mərasimlərdə daim bu fikri qürurla vurğulayırdı: "Bizim gözəl incəsənətimiz, mədəniyyətimiz, bənzərsiz xalq musiqimiz və ondan bəhrələnən, onun əsasında yaranan müasir, peşəkar musiqimiz var."

Bir dövlət başçısı kimi Heydər Əliyev daim sənətkara qayğı göstərir, istedadları tapıb üzə çıxarır, onları dəstəkləyir, yeni yaradıcılıq uğurlarına ruhlandırırdı. Respublikamızda ilk dəfə olaraq məktəbyaşlı uşaqlar arasında böyük istedadın cücərtilərini aşkar edərək onların ən istedadlılarını fərqləndirmək üçün "Qırmızı kitab" açdırdı və ora adı düşən hər kəsə Prezident təqaüdü təyin etdi. Bu şərəfli təqaüdə layiq görülən neçə-neçə yeniyetmə hazırda mədəniyyət və incəsənətin müxtəlif sahələrində çalışaraq böyük uğurlar qazanırlar.

Ulu öndərin incəsənət xadimləri ilə hər bir görüşü əlamətdar, tarixi hadisəyə çevrilirdi.

Ziyalılara və incəsənət xadimlərinə Prezident təqaüdləri verilməsi, Vətənin ən yüksək fəxri adları, orden və medalları və digər mükafatları ilə təltif edilməsi, yaradıcılıq və xatirə gecələrinin dövlət səviyyəsində qeyd olunması üçün sərəncamlar imzalaması bu sahənin adamlarını yeni-yeni yaradıcılıq uğurlarına səsləyirdi. Heydər Əliyev mədəniyyət və incəsənət sahəsində hədsiz zövqə, yüksək intellektual səviyyəyə və incə duyuma malik hərtərəfli şəxsiyyət idi. Bütün sahələrdə olduğu kimi, sənət adamları ilə də onların öz ampulasında yüksək səviyyəli sənətşünas kimi danışmağı sevirdi. Heydər Əliyevin fitri istedadına hər kəs, o cümlədən sənət adamları heyran qalırdılar. Mədəniyyətin, incəsənətin inkişafı, onun təbliği və tanınması sahəsində yorulmadan çalışan, imzaladığı qərar, fərman və sərəncamlarla ona təkan verən ulu öndər deyirdi ki, mənim ən çox rahatlıq tapdığım yer teatrdır.

Heydər Əliyevin təşəbbüsü və bilavasitə rəhbərliyi ilə ölkə ərazisindəki bir sıra tarixi-memarlıq abidələrimiz bərpa olunmuş, M.P. Vaqifin, H.Cavidin məqbərələri inşa edilmiş, İ.Nəsiminin, C.Cabbarlının və digərlərinin heykəlləri ucaldılmış, büstləri qoyulmuş, yaşadıqları binaların önündə barelyefləri açılmışdır.

Ümummilli liderimiz "Kitabi-Dədə Qorqud" kimi qədim yazılı abidələrimizin , Füzuli, Nəsimi kimi söz korifeylərimizin yubileylərini dünya miqyasında keçirməklə həm Azərbaycan xalqını, mədəniyyətini bütün Yer üzünə tanıtdırdı, həm də onların xalqımıza, Azərbaycana məxsusluğunun bütün dünyada təsdiqinə nail oldu.

Heydər Əliyevin təşəbbüsü ilə ən yeni avadanlıq və müasir texnika ilə təchiz olunmuş, dünya standartlarına cavab verən bir sıra yeni mədəniyyət ocaqları yaradılmış və yenidən qurulmuşdur. Respublika sarayı, Əl Oyunlan sarayı, "Gülüstan" sarayı, Opera studiyası, Xoreoqrafiya məktəbi, Azərbaycan Dövlət Opera və Balet Teatrı, Musiqili Komediya Teatrı, Azərbaycan Dövlət Filarmoniyası və digər mədəni obyektlər Azərbaycan memarlığının palitrasını zənginləşdirmişlər.

Ulu öndərin mədəniyyətin müxtəlif sahələrinə dair mülahizələri , sənət barədə düşüncələri onun bu sahəyə vurğunluğunu, təəssübkeşliyini, eyni zamanda ədəbiyyatımızın, incəsənətimizin dərin bilicisi, xiridarı və tərənnümçüsü olduğunu əyani şəkildə nümayiş etdirirdi.Yazıçı, şair, rəssam, heykəltəraş, memar, bəstəkar ilə dərin diskusiyalara girən Heydər Əliyevin sənət barədə düşüncələri bir daha sübut edir ki, o, geniş dünyagörüşünə, dərin ensiklopedik biliyə və fenomenal bədii təfəkkürə malik bir şəxsiyyət idi.

Heydər Əliyevin milli-mədəni irsimizin zənginləşməsi istiqamətində gördüyü böyük işlərin bir hissəsi "Heydər Əliyev mədəni irsimizin keşiyində" adlı sanballı iki cildlikdə öz əksini tapmış, tanınmış kinorejissor Vaqif Mustafayev on iki hissəli "Heydər Əliyev" sənədli filminin 8-ci seriyasını çəkmişdir.

Ulu öndərin bu sahədəki fəaliyyətini hazırda onun siyasi varisi, Prezident İlham Əliyev uğurla davam və inkişaf etdirir. Mədəniyyət və incəsənət sahəsində ölkə başçısının imzaladığı fərman və sərəncamlar bunun bariz nümunəsidir. Fəxrlə deyə bilərik ki, keçmiş SSRİ məkanında ilk dəfə olaraq 2006-cı ilin dekabrında "Teatr və teatr fəaliyyəti haqqında" Qanunun ölkəmizdə qəbul edilməsi də bu uğurlu siyasətin ən parlaq təzahürüdür.

Vaxtilə Heydər Əliyev mədəniyyət .sahəsində əldə edilən uğurlara işarə edərək demişdir: "Xalqımızın incəsənət, mədəniyyət sahəsindəki nailiyyətləri Vətənini, millətini sevən hər bir azərbaycanlı üçün iftixar mənbəyidir. Mən bununla daim fəxr etmişəm."

İki sahil.- 2007.- 9 may.- S. 13.