Şuşada Azərbaycana aid izləri silmək istəyirlər
Nizami Bəhmənov: “Şəhərdə olan 371 tarixi abidənin əksəriyyəti ermənilər tərəfindən dağıdılıb”

“Şuşanın baş planı 1750-ci ildə Qarabağ xanı Pənah xan Cavanşirin təşəbbüsü ilə hazırlanıb. Ermənilərin bu planı dəyişmək iqtidarı yoxdur. Çünki bunun üçün Şuşanın 17 qədim məhəlləsi tamamilə dağıdılmalıdır”.
APA-nın məlumatına görə, Dağlıq Qarabağın azərbaycanlı icmasının rəhbəri Nizami Bəhmənov jurnalistlərə bildirib ki, ermənilərin Şuşanın baş planının hazırlanması haqda yaydıqları informasiya Azərbaycanı qıcıqlandırmaq məqsədi daşıyır. O, Ermənistanın Şuşanı erməniləşdirmək istiqamətində apardığı siyasətinin uğursuzluqla nəticələnəcəyini də deyib: “Şuşada olan 371 tarixi Azərbaycan abidələrinin əksəriyyəti ermənilər tərəfindən dağıdılıb. Ermənistan bununla Şuşada Azərbaycana aid olan izləri silmək istəyir. Ermənilər bilməlidirlər ki, onlar nə qədər cəhd etsələr də, Şuşanın erməni şəhəri kimi tarixini süni şəkildə qədimləşdirə bilməyəcəklər”. N.Bəhmənov Dağlıq Qarabağ münaqişəsinin həlli istiqamətində aparılan danışıqlar prosesinə də münasibət bildirib: “Azərbaycan prezidentinin danışıqlarla bağlı çıxışı bizdə nikbinlik yaradıb. Hesab edirik ki, Ermənistan rəhbərliyinin bəyanatları cəfəngiyatdır. Bu bəyanatlar daha çox Ermənistanın daxili siyasətinə hesablanıb”. N.Bəhmənov diaspor təşkilatlarını aktiv şəkildə Azərbaycan dövlətinin bu istiqamətdə apardığı siyasətə dəstək verməyə çağırıb.

Müsavat.-2007.-9 may.-S.3.