Tarixi abidələrimizin siyahısı yenidən hazırlanır

Azərbaycan ərazisində yerləşən tarixi abidələrin siyahısı yenidən hazırlanacaq. Azərbaycan Milli Elmlər Akademiyasının Etnoqrafiya və Arxeologiya İnstitutundan verilən məlumata görə, prezidentin abidələrin siyahısının yenidən hazırlanması ilə bağlı xüsusi göstərişi var. İnstitut yeni siyahını Mədəniyyət və Turizm Nazirliyi ilə birgə tərtib edəcək. Məlumat üçün bildirək ki, bu vaxta qədər arxeoloqlarımız tərəfindən respublika ərazisində 6000-dən artıq qədim tarixi abidə aşkarlanıb.

İşğal olunmuş ərazilərdəki tarixi abidələrin vəziyyətinə gəldikdə isə öyrəndik ki, bununla bağlı Avropa Şurası Parlament Assambleyasında məruzə hazırlanacaq. "Avropa Şurası Parlament Assambleyası Cənubi Qafqazda tarixi və mədəni abidələrin vəziyyəti ilə ciddi maraqlanır" - deyən millət vəkili, AŞ PA-dakı Azərbaycan nümayəndə heyətinin üzvü Qənirə Paşayeva bildirib ki, bu məqsədlə Oharra adlı şəxs qurumun məruzəçisi təyin edilib: "Azərbaycanın AŞ PA-dakı nümayəndə heyəti işğal edilmiş ərazilərimizdə törədilmiş yanğınlarla bağlı dəfələrlə məsələ qaldırıb. Hətta müvafiq sənədlər təqdim edilib. Buna baxmayaraq, bu istiqamətdə fəaliyyətimizi daim davam etdirməliyik. İnanıram ki, məruzəçi istər Ermənistan ərazisindəki Azərbaycan abidələrinin, istərsə də işğal olunmuş torpaqlardakı tarixi və mədəni abidələrin vəziyyəti barədə obyektiv məruzə hazırlayacaq. Məruzəyə qurum tərəfindən də obyektiv qiymət veriləcək".

Kaspi.-2007.-17 may.-S.17.