Əhmədov Q

Əhmədov Q.

Qusar qış turizm kompleksinin tikintisinə start verilmişdir

"2007-ci ildə qış turizminin inkişafı üçün böyük işlər planlaşdırılır. Yəqin ki, yaxın zamanlarda Azərbaycanda müasir, dünya səviyyəli qış kurortunun yaradılması üçün təqdimat keçiriləcəkdir. Qusar rayonunda artıq yerlər müəyyən olunub və Azərbaycan qış turizmi mərkəzinə çevrilə bilər. Bunun bütün şimal bölgəsinə, orada yaşayan insanlara çox müsbət təsiri olacaqdır"

İlham Əliyev

Mütəxəssislərin fikrincə, Azərbaycan turizm sənayesinin inkişafı üçün zəngin ehtiyatlara malikdir. Bu, hər şeydən əvvəl onun çox əlverişli coğrafi mövqeyə malik olması ilə əlaqədardır. Belə ki, Azərbaycan Şərq və Qərb sivilizasiyasının qovşağında, Transqafqaz nəqliyyat dəhlizinin ortasında yerləşir ki, bütün infrastrukturlar-Avropanı Qafqaz və Mərkəzi Asiya ölkələri ilə birləşdirən hava və dəniz daşımaları, magistral avtomobil və dəmir yolları buradan keçir.
Azərbaycan Respublikası Prezidentinin sərəncamı ilə təsdiq edilmiş Turizmin inkişafına dair Dövlət Proqramında göstərilir ki, nadir təbii-iqlim şəraiti olan Azərbaycan Respublikasında planetin 11 iqlim qurşağından 9-u mövcuddur. Ölkənin fauna və flora aləmi müxtəlif və zəngindir. Azərbaycanda 12 təbii və tarixi qoruq, 17 müvəqqəti qoruq və ovçuluq təsərrüfatı var. Xəzər dənizi boyunca 7 istirahət zonası yerləşir. Ölkə ərazisində 6 mindən artıq memarlıq və mədəniyyət abidələri qorunub saxlanılır. Ölkənin təbii, mədəni və tarixi irsi onun beynəlxalq turizm bazarına daxil olmasına real zəmin yaradır.
Azərbaycanın şimal-şərqində başı qarlı Şahdağın ətəyində yerləşən vadilər diyarı Qusar rayonu turizm üçün xüsusilə geniş təbii-coğrafi potensiala malikdir. Rayonun ərazisindəki Bazardüzü dağı (4466 metr) Azərbaycanın ən uca nöqtəsidir. Zəngin florası ilə seçilən rayonun ərazisinin 20 faizi meşələrlə örtülmüşdür. Çayların sahili boyunca əsasən enliyarpaqlı ağaclar, o cümlədən, vələs, palıd və fıstıq ağaclarından ibarət tuğay meşələri uzanır. Bu meşələrdə sumax, əzgil, yemişan, zoğal, itburnu, qaragilə bitir, dərman bitkiləri və cır meyvələr geniş yayılmışdır. Rayonun heyvanat aləmi də zəngindir. Burada ayı, canavar, qaban, dağ keçisi, quşlardan qızılquş və başqaları geniş yayılmışdır. Qusar rayonunun ərazisində sahəsi 15.000 ha olan dövlət yasaqlığı yaradılmışdır. Urva kəndinin yaxınlığında yerləşən, sahəsi 7 hektar olan "Əlistan baba" adlı fıstıq meşəsi xüsusi mühafizə olunur. Şahnabaz və Ləzə şəlalələri rayonun fəxridir. Bu şəlalələrin qeyri-adi mənzərəsi və günəşdə bərq vuran damlaları insanları heyran edir.
İl boyu bəyaz qarla örtülü olan qocaman Şahdağ mütəxəssislər tərəfindən qış turizmi üçün daha münasib yer kimi yüksək qiymətləndirilmişdir. Odur ki, burada Xizək Dağ Turizm bazası yaratmaq ideyası meydana gəlmişdir.
Respublika Prezidenti İlham Əliyev mütəxəssislərin rəyini yüksək qiymətləndirmiş və Şahdağın ən dilbər guşəsində unikal qış turizm kompleksinin yaradılmasına xeyir-duasını vermişdir. Artıq regionda analoqu olmayan bu nəhəng kompleksin layihə üzrə tikintisinə start verilmişdir. Şahdağ yaylağında Kuzun və Zindanmuruq kənd bələdiyyələrinin ehtiyat fondundan kompleks üçün 1700 hektar sahə ayrılmışdır. Kompleks işə salındıqdan sonra burada təxminən 5 min işçinin çalışmasına və eyni zamanda ətraf kəndlərdə yaşayan əhaliyə öz təsərrüfat məhsullarını satmaq imkanı yaranacaqdır. Bu tədbir eyni zamanda əmək ehtiyatlarından daha dolğun istifadə etmək və əhalinin səmərəli məşğulluğunu təmin etmək məqsədilə Azərbaycan Respublikası Prezidentiin 2005-ci il 26 oktyabr tarixli 1068 nömrəli sərəncamı ilə təsdiq edilmiş "Azərbaycan Respublikasının Məşğulluq Strategiyası (2006-2015-ci illər)" üçün gözəl töhfə olacaq.
Rayon icra hakimiyyəti başçısının müavini A.Balametov söhbət zamanı qeyd etdi ki, hər şey yoldan başlayır. Qış turizm kompleksinin tikintisi üçün nəzərdə tutulmuş sahəyə-Kuzun, Aladaş, Ləzə kəndləri istiqamətində geniş asfalt yol çəkilir. Dağlara doğru təxminən 30 km. uzanan bu yolun çəkilişi ilə paralel olaraq qaz, işıq, su təchizatı üzrə mütəxəssislər də öz işlərini görürlər. Rayon əhalisi bu tədbirdən olduqca məmnundur. Çünki son dərəcə böyük iqtisadi və həm də ictimai-siyasi əhəmiyyəti olan kompleksin Qusar rayonunda inşa edilməsi bu bölgədə əhalinin məişət və məşğulluğuna olduqca müsbət təsir göstərəcəkdir. Zindanmuruq, Ləzə kimi ucqar dağ kəndlərinin sosial statusu, ictimai mənzərəsi birdən-birə köklü surətdə dəyişəcək, müasir infrastrukturlar formalaşacaq, özəl sektor inkişaf edəcək, yeni peşə və ixtisas hazırlığı tələb edən iş sahələri yaranacaqdır. Rayon icra hakimiyyəti bu zərurət və ehtiyacı nəzərə alaraq Bakı Dövlət Pedaqoji Kollecinin Qusar şöbəsində turizm xidməti üçün zəruri olan ixtisaslar üzrə qrupların açılmasını təklif etmişdir. Təsəvvür edin ki, Qusar qış turizm kompleksi tam işə düşdükdə o beş minə yaxın turistə xidmət göstərə biləcəkdir. Bu, bizim region üçün əsl möcüzədir və onun reallaşması, ölkə başçısının dediyi kimi, Azərbaycanı regionda qış turizmi mərkəzinə çevirəcəkdir.
Qusar son illər daxili turizm üzrə ixtisaslaşmış bölgələrdən biri kimi tanınır. Hazırda burada fəaliyyət göstərən Suvar dağ turist və Qarabulaq istirahət zonaları respublika miqyasında yaxşı tanınan guşələrdəndir. Lakin bu ünvanlar nə qədər cəlbedici və gözəl olsalar da mövsümi xarakter daşıyır. Qusar qış turizm mərkəzi isə Azərbaycanda mövsümi turizmin şahlığına son qoyacaq və ilin bütün fəsillərində ölkəmizin qapıları qonaqların üzünə açıq olacaqdır. Hər bir turist ilin hər hansı çağında Vətənimizə məxsus 9 iqlimin hər birinə səyahət edə biləcəkdir.

Azərbaycan.-2007.-22 may.-S.4.