Kamal M.

Turizmin inkişafına layiqli töhfələr verək

Respublikamızın əldə etdiyi sosial-iqtisadi nəticələri təhlil edən beynəlxalq ekspertlər digər sahələrlə yanaşı, turizmin inkişafı üçün də böyük potensial imkanların olduğunu xüsusi vurğulayırlar. Belə ki, olduqca əlverişli coğrafi ərazidə yerləşən Azərbaycan təbii sərvətlərlə zəngin ölkədir. Onun füsunkar təbiəti, mineral bulaqları, çoxsaylı istirahət guşələri, tarix və mədəniyyət abidələri hər zaman turistləri özünə cəlb edibdir. Bütün bunları nəzərə alıb bu sahəyə investisiyalar yönəltməklə turizm sektorunda xidmət səviyyəsini beynəlxalq standartlara çatdırmaq mümkündür. Ölkəyə əlavə dividendlər gətirən turizmin inkişafı dövlət siyasətinin prioritet istiqamətlərindən biridir. Əsası ümummilli liderimiz Heydər Əliyev tərəfindən qoyulmuş, bu gün uğurla davam etdirilən bu sahə möhtərəm Prezidentimiz İlham Əliyevin imzaladığı sərəncam və fərmanlar turizmin inkişafının yeni mərhələyə daxil olmasına imkan verib. Dövlət tərəfindən bütövlükdə turizmin inkişafına xidmət edən qlobal layihələrin həyata keçirilməsi nəzərdə tutulubdur ki, aparılan məqsədyönlü tədbirlər də artıq öz nəticəsini verməkdədir. Mövcud vəziyyəti təqdirəlayiq hal kimi dəyərləndirən "Gilan" Turizm Şirkətinin baş meneceri Həsən Əliyev bu yüksəlişlə ölkəmizdə turizm sektorunun perspektivli gələcəyinə inamını ifadə etdi. Şirkətin builki mövsümə xüsusi hazırlıq gördüyünü, xidmət səviyyəsinin yüksəldilməsi istiqamətində yeniliklərin tətbiq olunacağını dedi.

"Gilan" turizm ölkə başçısının imzaladığı regionların sosial-iqtisadi inkişafı Dövlət Proqramını rəhbər tutaraq özünün fəaliyyət istiqamətini müəyyənləşdiribdir. Şirkətimizin daxil olduğu "Gilan" Holdinq regionların iqtisadi inkişafının yüksəldilməsində fəal iştirak edir. Hazırda bir sıra sahələrdə əlverişli və səmərəli investisiyalar qoymağa nail olmuşdur. Bu ildən turizm sektoruna layiqli töhfələr vermək niyyətindədir. Bunun üçün şirkətimizin maddi-texniki bazası möhkəmləndirilmiş, təcrübəli kadrlardan ibarət kollektiv formalaşdırılmışdır. İşimizi beynəlxalq təcrübəyə əsaslanan prinsiplər əsasında qurmuşuq. Ölkəmizə gələn turistlərə ən yüksək səviyyədə xidmət təşkil ediləcəkdir. Onu da əlavə etmək lazımdır ki, son dövrlər regionda lider dövlətə çevrilən Azərbaycana maraq artmışdır. Eyni zamanda bir-birinin ardınca reallaşan beynəlxalq layihələrin sayəsində nüfuzlu şirkətlərin ölkəmizə gəlməsini təmin edir.

Bu şirkətlərdə çalışan əcnəbi vətəndaşlar da respublikamızı daha yaxşı tanımaq istəyirlər. Asudə vaxtlarında səyahətə çıxmaq onların arzusudur. Bu mənada onları da turist saymaq mümkündür. Deməli, daxili turizmin inkişafı həyati zərurətdən irəli gəlir. "Gilan" turizm bütün maraqları əhatə edən xidmət təklif edir. Qəbələdə, Şamaxıda, İsmayıllıda, Xaçmazda üç və beş ıılduzlu otel, kotteclərimiz turistlərin xidmətindədir. Gələcəkdə digər bölgələrdə, o cümlədən cənub bölgəsində bu qəbildən istirahət kompleksləri istifadəyə veriləcəkdir. Şirkət turistləri yalnız yüksək səviyyəli komplekslərdə yerləşdirməklə kifayətlənməyərək onların mənalı istirahətini təmin edən bütün tədbirləri həyata keçirəcəkdir. Məqsəd bütövlükdə turizmin inkişafına dəstək vermək, ölkəmizə turistlərin axınına nail olmaqdır. Bu məqsədə çatmaq üçün şirkət qarşılıqlı əməkdaşlığa üstünlük verir, "Gilan" turizmin həyata keçirəcəyi geniş layihələrdə müxtəlif şəhərlərə, bölgələrə səyahətlərlə yanaşı, həftə sonu ekskursiyaların təşkili də nəzərdə tutulubdur. Aparılan təhlillərdən aydın olub ki, məhz həftə sonu gəzintilərə turistlər daha çox üstünlük verirlər. Yaxın bölgələrə qısamüddətli, nisbətən uzaqlara bir neçə günlük səfərlər vaxt baxımından çox adama sərfəlidir. Özünün yüksək keyfiyyətli xidməti ilə gəncləri, tələbələri, burada çalışan əcnəbi iş adamlarını bu səfərlərə cəlb etmək üçün şirkət əlavə tədbirlər görür. Şirkətin mövsümə təqdim etdiyi xidmətlərin həcmi və çeşidi çoxdur. Qiymətlərin xidmət səviyyəsindən asılı olaraq münasib olması xüsusilə nəzərə alınıbdır. Gələcəkdə müxtəlif istiqamətlər üzrə yol kənarlarında turistlərin mənalı istirahətini təmin edən digər tədbirlər təşkil olunacaqdır. Səfərə çıxan turistlər həm asudə vaxtlarını səmərəli keçirməli, həm də Azərbaycan, onun tarixi keçmişi haqqında daha çox bilgi əldə etməlidirlər. Şirkətin əhatə dairəsinin genişləndirilməsi üçün bütün bölgələrdə agentliklərin açılması, reklam və təbliğatın artırılması perspektivdə duran məsələdir. Turizm sektorunda inkişafla paralel olaraq şirkətin fəaliyyəti daha da təkmilləşəcəkdir. "Gilan" turizmin qarşıya qoyduğu məqsəd, fəaliyyət istiqamətləri uğurlu başlanğıcdan xəbər verir.

Bir məsələni də unutmaq olmaz ki, bütün sahələrdə uğurun əsasını mütəxəssis amili həll edir. Artıq bu vacib sahə üçün ixtisaslı kadrların hazırlanması həyata keçirilməkdədir.

Ümummilli liderimiz Heydər Əliyevin hələ Naxçıvan MR Ali Məclisinin sədri olarkən bir qrup gəncin bu ixtisasa yiyələnməsi üçün Türkiyəyə oxumağa göndərməsi onun uzaqgörənliyindən irəli gəlirdi. İndi həmin gənclər bu sahədə özlərinin bacarıqlarını nümayiş etdirirlər. "Gilan" turizmin baş meneceri Həsən müəllim də həmin gənclərdən biridir. İnanırıq ki, şirkət turizmin inkişafına bundan sonra da layiqli töhfələr verəcəyini bu mövsümdə əldə edəcəyi nailiyyətlərlə sübut edəcəkdir.

Respublika.- 2007. -23 may.- S. 6.