İlahə

Əlillərlə bağlı fotosərgi keçirilib

Avropa Əlilliyi olan insanların hüquqlarının müdafiəsi günü ilə əlaqədar olaraq Avropa ölkələrində, eləcə də Azərbaycanda müxtəlif səpkili tədbirlər keçirilir. Əlil insanlar cəmiyyətin ən həssas təbəqəsi olub, xüsusi qayğı və diqqət tələb edirlər. Azərbaycanda 350 mindən çox əlil insan var, onların 43 mindən çoxu uşaqlardır.

"Birliyə Doğru" Əlil və Kimsəsiz Uşaqlar Birliyi və "Müstəqil Həyat" İB Avropa Əlilliyi günü ilə əlaqədar olaraq "Nizami" kinoteatrında "Reallığın aynası-2" adlı fotosərgi keçirdi. "İrşad" otelinin təşkilatı dəstəyi ilə baş tutan tədbirə 7 təşkilat- Azərbaycan Diabet Liqası, Birliyə Doğru İB, "Müstəqil Həyat İB, UAFA təşkilatı, "Göy Qurşağı" reabilitasiya mərkəzi, "Müşfiq" cəmiyyəti və "Oriqami" təşkilatları qatılmışdılar.

Video-sərgi xüsusi qayğıya ehtiyacı olan uşaqların cəmiyyətə inteqrasiyasına həsr olunaraq cəmiyyətdə əlilliyi olan insanlara qarşı münasibətin müsbət istiqamətdə dəyişilməsi və ictimaiyyətin bu məsələyə diqqətini yönəltmək məqsədi daşıyır. “Müstəqil Həyat”Mərkəzinin direktoru Aydın Xəlilovun sözlərinə görə, tədbirin keçirilməsinin əsas məqsədi cəmiyyətin diqqətini bu problemə çəkmək, onun həlli yollarını göstərməkdən ibarətdir.

"Birliyə Doğru" İB-nin direktoru Zərifə Quliyeva xüsusi qayğıya ehtiyacı olan uşaqların əsas probleminin ünsiyyət olduğunu dilə gətirdi: "Xüsusi qayğıya ehtiyacı olan uşaqlar cəmiyyətdən təcrid olunurlar. Bu hal isə onların inkişafına mənfi təsir göstərir, onlara mənəvi cəhətdən əzab verir. Beləliklə, cəmiyyətə çıxışları olmayan və ünsiyyətdə ola bilməyən insanlar dörd divar arasında qalırlar.

Tədbirdə hər bir təşkilat öz növbəsində gördükləri işlər haqqında geniş informasiya verdilər. Tədbirin daha maraqlı keçməsi üçün müsabiqə elan edildi və auditoriyanın seçimi ilə qaliblər müəyyənləşdi. Beləliklə, ən yaxşı şəkil nominasiyası üzrə "Göy qurşağı" reabilitasiya mərkəzi, ən yaxşı video-çarxa görə "Müşfiq" Cəmiyyəti və Diabet Liqası qalib gəldi. Bundan başqa, uşaqlara onların problemlərinə uyğun "Şrek" cizgi filmi nümayiş olundu.

Paritet.- 2007.- 8-11 may.- S. 13.