Lalə

Fotohəvəskarların internet müsabiqəsi başa çatdı

"Mobiloqrafiya"ya 700-dən çox foto təqdim edilib

"Mobiloqrafiya" fotohəvəskarların II internet müsabiqəsi başa çatdı. Azərbaycanın internet məkanında foto sənəti sahəsində ilk müsabiqə olan "Mobiloqrafiya" Azerfoto Agentliyi tərəfindən və "Hewlett Packard (HP)" şirkətinin ölkəmizdəki nümayəndəliyinin baş sponsorluğu ilə keçirilib.

Müsabiqənin məqsədi Azərbaycanda fotoreportyorluq sənətinin inkişafına təkan vermək, bu sahədə mövcud təcrübənin genişləndirilməsi, müsabiqə iştirakçılarının yaradıcı bacarıqlarını önə çıxarmaq, foto sənəti ifə məşğul olan həvəskar insanları stimullaşdırmaqdır.

Fevralın 1-dən başlayan "Mobiloqrafiya" internet müsabiqəsində 100-ə yaxın internet istifadəçisi-fotohəvəskar iştirak edib. Təqdim olunan işlərin ümumi sayı 700 fotodan çox olsa da münsiflər heyətinin rəyinə görə, keyfiyyət və orijinallıq baxımından cəmi 361 foto müsabiqədə iştirak hüququ qazanıb. Münsiflər heyətinin qərarına görə, "Mobiloqrafiya" müsabiqəsinin qalibləri Aytən Novruzlu (14 yaş), Pərviz Baxşəliyev, İlqar İlyasov, Ceyhun Nəzərli, Kənan Məcidov və Ruqiyyə Hacızadə olub. Müsabiqədə iştirak edən iki xarici vətəndaşın göndərdiyi foto isə diploma layiq görülüb. Bunlar Bosniya və Herseqovina vətəndaşları Betul Onal və Qamzə Camdır.

Qeyd edək ki, 2007-ci il mayın 1-dən "Mobiloqrafiya" fotohəvəskarların III internet müsabiqəsi başlayır.

Üç nöqtə.- 2007.- 2 may.- S. 13.