Quliyev Lazım

Ağcabədidə Heydər Əliyevin abidəsinin açılışı olmuşdur

Müstəqil Azərbaycan dövlətinin qurucusu, ümummilli lider Heydər Əliyevin anadan olmasının 84-cü ildönümü respublikamızin hər yerində olduğu kimi, Ağcabədi rayonunda da əsl bayrama çevrilmişdi. Qarabağın bu dilbər guşəsində ulu öndərə sonsuz hörmət və ehtiram bəslənir. Bu el məhəbbətinin ifadəsi olaraq Ağcabədinin mərkəzi meydanında Heydər Əliyevin əzəmətli abidəsi ucaldılmışdır. Bu günlərdə abidənin açılışına həsr olunmuş təntənəli mərasim keçirilmişdir.
Toplantıda geniş məruzə ilə çıxış edən Ağcabədi Rayon İcra Hakimiyyətinin başçısı Şahin Məmmədov demişdir ki, müstəqil Azərbaycan gələcəyə doğru tərəqqi yolunda əzmlə addımlayır.Ümummilli lider Heydər Əliyevin dövlətçilik ideyalarının reallığa çevrildiyini gördükcə, zamanında ölkəmizin inkişafı üçün zəmin hazırlamış ulu öndərimizin uzaqgörənliyinə heyran qalırıq. Heydər Əliyev adını ucaldan, onu əbədiləşdirən, bu adı tarixin səhifələrinə qızıl hərflərlə yazan, milyonlarla soydaşımızın qəlbinə həkk edən ən əsas amil bu adın Azərbaycan dövlətçiliyi anlayışının simvoluna çevrilməsidir. Ulu öndərimiz tarixi xidmətləri ilə hələ sağlığında xalqımızın qəlbində özünə əbədi bir abidə ucaltmışdır. Açılışına toplaşdığımız bu möhtəşəm abidə isə Ağcabədi camaatının xalqımızın qüdrətli oğluna sonsuz hörmət və ehtiramının ifadəsidir.
Toplantıda Milli Məclisin üzvləri Tahir Rzayev və Aqil Abbas, şair Ənvər Əhməd, Qarabağ müharibəsi əlili Ramil Nağıyev, YAP rayon təşkilatı sədrinin müavini Eldəniz Qənbərov, 3 saylı orta məktəbin şagirdi Türkan Dadaşzadə, əməkdar müəllim Zəhra İbrahimova çıxış etmişlər.
Abidə üzərindən ağ örtük götürüləndən sonra rayon rəsmiləri, qonaqlar və ictimaiyyətin nümayəndələri heykəlin önünə saysız-hesabsız əklillər, tər qızıl güllər və qərənfillər qoymuşlar.

Azərbaycan.-2007.-19 may.-S.5.