Saatlıda Heydər Əliyevin abidəsi açılmışdır

Mayın 10-da Saatlıda ümummilli lider Heydər Əliyevin abidəsinin açılışı olmuşdur.
Tədbir iştirakçıları öncə tamamilə yenidən qurulmuş Heydər Əliyev meydanında salınmış Şəhidlər Xiyabanını ziyarət etmiş, torpaqlarımzın bütövlüyü uğrunda şəhid olmuş Vətən oğullarının xatirəsini hörmətlə anmışlar.
Sonra Heydər Əliyevin abidəsinin açılış mərasimi keçirilmişdir. Rayon icra hakimiyyətinin başçısı Vaqif Hüseynov abidənin örtüyünü açmışdır. Ümummilli liderin xatirəsi bir dəqiqəlik sükutla yad olunmuşdur. Abidə önünə əklil və gül-çiçək dəstələri qoyulmuşdur.
V.Hüseynov dünya şöhrətli dahi şəxsiyyətin həyat və fəaliyyəti barədə danışmışdır. O demişdir ki, azərbaycançılıq ideyasının, milli həmrəyliyin, Azərbaycanın inkişaf modelinin formalaşmasında, ölkəmizin dünyaya inteqrasiyasında fenomen tarixi şəxsiyyət olan ulu öndərin rolu əvəzsizdir. Bizim hər birimiz haqlı olaraq fəxr etməli və qürur duymalıyıq ki, Heydər Əliyevin Azərbaycanında yaşayır, çalışırıq. Bu gün Azərbaycanımız əsl inkişaf yolundadır. Biz sabahımıza, gələcəyimizə ümummilli liderin siyasi kursunun ən layiqli davamçısı, ürəkdən inanıb etibar etdiyimiz ölkəmizin Prezidenti İlham Əliyevin rəhbərliyi altında gedirik. Heydər Əliyevin uzaqgörənliklə söylədiyi kimi, dahi rəhbərin axıra çatdıra bilmədiyi taleyüklü məsələləri, planları, işləri indi bizim köməyimiz və dəstəyimizlə İlham Əliyev həyata keçirir.
Digər natiqlər – Yeni Azərbaycan Partiyası icra katibinin müavini, parlamentin deputatı Mübariz Qurbanlı, “Yeni Azərbaycan” qəzetinin baş redaktoru Alqış Həsənoğlu, Yeni Azərbaycan Partiyası Saatlı rayon təşkilatının sədri Lütfəli Şıxəliyev, Saatlıda çıxan “Dönüş” qəzetinin baş redaktoru Qaçay Əhmədov da ulu öndərin uğurlu sosial-iqtisadi inkişaf strategiyasının gətirdiyi dividendlərdən bəhs edərək, bu siyasətin Prezident İlham Əliyev tərəfindən müvəffəqiyyətlə həyata keçirildiyini, xalqın qarşıdakı prezident seçkilərində də indiki ölkə başçısını yeganə namizəd kimi dəstəkləyəcəklərini bildirmişlər.

Xalq qəzeti.-2007.-11 may.-S.3.