Fəxriyyə Xələfovanın geyimləri qonaqları heyrətləndirdi

Mərasimdən əldə olunan vəsait Şüvalandakı uşaq evinin idman zalının təmirinə sərf olunacaq

Ötən gün “Hyatt Recency” otelində möhtəşəm bir mərasim keçirildi. Azərbaycanda olan ən tanınmış iş adamları, səfirliyin nümayəndələri, beynəlxalq qadın klublarının üzvləri Fəxriyyə Xələfovanın qonağı oldular. Tanınmış Azərbaycan modelyeri ötən gün gerçəkləşdirdiyi mərasimdə "Cazibə" adlı yaz-yay kolleksiyalarını nümayiş etdirdi. Gecədə Fəxriyyə Xələfovanın 10 geyim dəsti həqiqətən qonaqları heyrətləndirə bildi. Ancaq tanınmış modelyerimizin kolleksiyasından öncə bir neçə dünya şöhrətli geyim firmalarının, modelyerlərin də kostyumları təqdim olundu. Xüsusilə Valentin Yudaşkinin cins kolleksiyaları maraq doğurdu. İtaliyanın məşhur "Les Corains", "Puma fashions" firmalarının geyim dəstləri də modellər tərəfindən təqdim olundu. Mərasimdə həmçinin qonaqların arasından xoşbəxt nömrənin sahiblərinə "Parfüm de Frans" tərəfindən hədiyyələr təqdim olundu. Daha sonra mərasimdə ev sahibliyi missiyasını yerinə yetirən Fəxriyyə Xələfova zala girişi ilə hamını təəccübləndirdi. Tanınmış modelyerin cazibədar görünüşü və üzərində olan əlbisəsi də diqqətdən kənarda qalmadı. Fəxriyyə Xələfova imkan tapıb media nümayəndələri ilə qısa brifinq də keçirdi. Bildirdi ki, mərasim xeyriyyə xarakteri daşıyır. Mərasimdən əldə olunan vəsait Şüvəlandakı uşaq evinin idman zalının təmirinə sərf olunacaq. Onu da qeyd edək ki, kifayət qədər baha qiymətə satılan biletlərin hamısından əldə olunan gəlir məhz uşaq evinin sakinlərinə təqdim olunacaq. Fəxriyyə Xələfova bildirdi ki, hələ mərasim başa çatmamış onda olan məlumata görə, kifayət qədər vəsait əldə olunub. Modelyer söhbət əsnasında onu da bildirdi ki, o, dünən axşam səfərdən qayıdıb. Qeyd edək ki, Fəxriyyə Xələfova bu dəfə Çinə və Hindistana səfər etmişdi. Onun sözlərinə görə, bu ölkələrə üz tutması təsadüfi deyil. Modelyer adıçəkilən ölkələrdə çox maraqlı parçaların, fərqli çalarlı ipəklərin olduğunu, yeni kolleksiyasında istifadə etmək üçün məhz oradan parçalar seçib gətirdiyini bildirib. Modelyer deyib ki, onun yaxın müddətə təqdim edəcəyi yeni kolleksiyası indiyə qədər təqdim olunanlardan bir çox cəhətləri ilə fərqlənəcək. Tanınmış modelyer geyim dəstləri barədə danışarkən bildirdi ki, hər bir modelyerin təqdim etdiyi kolleksiyalar həm də tamaşaçıya teoritik izah şəklində təqdim olunmalıdır. Onun sözlərinə görə, yaz-yay kolleksiyasında bu amil xüsusi nəzərə alınıb. Daha sonra mərasimdə Fəxriyyə Xələfovanın geyim kolleksiyaları nümayiş olundu.

Şərq.- 2007.-16 may.- S. 14.