Xeyriyyə aksiyası keçirilmişdir

"IWC" Beynəlxalq Qadınlar Klubunun himayəçiliyi ilə mayın 15-də əməkdar incəsənət xadimi, tanınmış modelyer Fəxriyyə Xələfovanın sərgisi nümayiş etdirilmişdir. Tədbir xeyriyyə məqsədilə təşkil edilmişdir.
Aksiyanın reklamından və F.Xələfovanın "Cazibədarlıq" adlı orijinal yaz-yay kolleksiyasının nümayişindən əldə ediləcək gəlir Şüvəlandakı uşaq evinin idman zalının təmirinə və zəruri avadanlıqla təchizinə xərclənəcəkdir.
Bu, F.Xələfovanın Beynəlxalq Qadınlar Klubu ilə ilk əməkdaşlığı deyildir. 2003-cü il iyunun 1-də keçirilən ilk birgə aksiya Uşaqları Beynəlxalq Müdafiə Gününə həsr edilmişdi.
Qeyd edək ki, Beynəlxalq Qadınlar Klubu 11 illik fəaliyyəti ərzində uşaq evləri və internat məktəblərinin abadlaşdırılmasına yönəldilmiş bir sıra xeyriyyə layihələri həyata keçirmişdir.

Azərbaycan.-2007.-16 may.-S.2.