Allahverdiyev E.

“Azərbaycantelefilm” bu günün salnaməsini yaradır

Son dövrlər Azərbaycan Televiziyasında gedən inkişaf "Azərbaycantelefilm" Yaradıcılıq Birliyinin fəaliyyətində də özünü göstərir. Birliyin çəkdiyi filmlər bir çox müsabiqələrdə iştirak edərək qalib olmuş, tamaşaçılar tərəfindən maraqla qarşılanmışdır. Təkcə bu il "Taleyimdən qaça bilmədim", "Taleyin 5 anı", "Söz haqqı", "Mən səni araram", Cəfər Cabbarlı, Əlibəy Hüseynzadə, Qənbər Hüseynli haqqında çəkilən filmlər telefilmin fəaliyyətindəki inkişafın bariz nümunəsidir. Bu haqda ətraflı "Azərbaycantelefilm" Yaradıcılıq Birliyinin direktoru Vüqar Tapdıqlı özü danışdı.

"Azərbaycantelefilm" Yaradıcılıq Birliyinin 2008-ci ildə 50 yaşı tamam olacaq. Bizim birliyin ilk filmi 1960-cı ildə efirə çıxıb. Bu günə qədər "Azərbaycantelefilm" Yaradıcılıq Birliyində 800 saat həcmində sənədli televiziya filmləri istehsal edilib və AzTV ilə nümayiş olunub. Bu filmlərin 500 saata qədəri kinolentə çəkilib, qalanı isə videofilmlərdir. 52 nəfərdən ibarət yaradıcı heyətlə çalışırıq ki, bunların da 46 nəfəri yaradıcı heyət, 6 nəfəri isə "Telefilm"in rəhbərliyidir. "Azərbaycantelefilm" Yaradıcılıq Birliyi AzTV-nin redaksiyalarından biridir. Əvvəllər "Telefilm" il ərzində 8,12, maksimum 18 saat sənədli film istehsal edirdisə, AzTV-yə yeni rəhbərlik gəldikdən sonra biz il ərzində 32 saat sənədli film istehsal edirik. Bu filmlərin 60 faizə qədərini sənədli filmlər, qalanını isə salnamələr təşkil edir. Salnamələr dövrümüzün ictimai-siyasi hadisələrini, mədəniyyəti, ziyalılarımızı əhatə edir. Bizim filmlərimizin il ərzində 32 saat həcmində formalaşması onunla əsaslanır ki, 7-8 rejissorumuz var, hər rejissor da il ərzində minimum 2-3 film çəkməlidir.

Fəaliyyətimiz tematik plana əsasən aparılır. Tematik planın tələbi 3 qaydadadır:

1. "Telefilmin öz işçiləri tərəfindən təqdim olunan mövzular.

2. Bizə kənardan təklif olunan mövzular.

3. Şirkətin bədii şurası və rəhbərliyi tərəfindən sifariş olunan mövzular. Qeyd etdiyim kimi, 3 mənbədən bizə mövzu gəlir. Bunların içindən 200-ə yaxınını seçib rəhbərliyə təqdim edirik. Onların müzakirəsindən sonra tematik plan təsdiq olunur. “Telefilm”də əvvəllər bədii filmlər çəkilsə də, hal-hazırda sənədli filmlər çəkirik. Yalnız sənədli bədii filmlərə üstünlük veririk ki, bu da fəaliyyətimizin bu yönümdə ixtisaslaşmasından irəli gəlir.

Efirə gedən ən son 3 filmimiz AzTV rəhbərliyi şəviyyəsində qəbul olunub. "Ürəkdən ürəyə" (Fidan və Xuraman Qasımova bacıları haqqında film), "Əziz Əliyev haqqında" və "Uluxanlı məktəbi". "Uluxanlı məktəbi" yaxın günlərdə televiziyada nümayiş olundu. Qeyd etdiyim digər 2 film də tezliklə ekranlara çıxacaq.

Bir filmin üzərində 2-3 ay işləyirik. Lakin elə filmlərimiz də olur ki, onun çəkilişləri il boyu davam edir. "Mücadilə" adlı filmimiz 8 aya başa gəlmişdi.

- Hal-hazırda hansı filmlər çəkiliş prosesindədir?

- Hazırda 2 film üzərində işləyirik. "Quba soyqırımı" adlı film artıq çəkilib, montaj işləri aparılır. Bu filmdə azərbaycanlı və yəhudilərin Qubada ermənilər tərəfindən soyqırıma məruz qalmalarından bəhs edilir.

2-ci filmimiz isə şərti olaraq "Ermənilər: “mif və həqiqət” adlanır. Bu filmin çəkilişləri isə hələ təzə başlayıb.

"Azərbaycan telefilm"in istehsal etdiyi filmlər bir informasiya mənbəyidir. Sadəcə olaraq, bizim informasiyamız 10-20 ildən sonrakı dövrlər üçün nəzərdə tutulub. Bundan əlavə, Azərbaycan Televiziyası peyk vasitəsilə bütün dünyaya yayımlanır. Bu səbəbdən, bizim işimizdə ən əsas amil məsuliyyətdir. Çəkdiyimiz filmlərdə göstərilən faktların hamısı dövlətin ictimai institutları tərəfindən dəqiqləşdirilməli, rəsmən təsdiq olunmalıdır. Bizim filmlərdə faktlar zərrə qədər də olsa şişirdilmir.

- Çəkilən filmlərdə hansı mövzulara daha çox üstünlük verilir?

- Çəkdiyimiz filmlərin böyük əksəriyyətində Qarabağla bağlı problemimizi qabartmağa çalışırıq. Rejissor Rövşən Almuradlının çəkdiyi "Bəsdir, ağlama" adlı bədii film də kifayət qədər faktlarla zəngindir. Bu günsə biz daha çox konkret qəhrəmanları olan filmlərə müraciət edirik. Haqqında film çəkdiyimiz insanların öz taleləri ilə yanaşı, Azərbaycanın tarixini də əks etdirməyə çalışırıq. Məsələn, Lətif Hüseynzadə haqqında olan "Əsrin şahidi" filmində qəhrəmanımız Azərbaycanın tarixi faciələri haqqında olduqca geniş danışıb.

Ümumiyyətlə, bu gün dünyada bədii filmlərlə yanaşı, sənədli filmlərə də ehtiyac duyulur. Təsadüfi deyil ki, bu gün çəkilən bədii filmlərin çoxunda sənədli epizodlardan istifadə edirlər. Xüsusi olaraq tarixi filmlərə maraq daha çoxdur. Abbasqulu Ağa Bakıxanov haqqında çəkdiyimiz film buna sübutdur. "Qüdsi" adlı filmin çəkilişləri İçərişəhərdə aparılır. Bildiyimiz kimi, A.Bakıxanov tarixçi, hərbçi, tərcüməçi, diplomat, ən nəhayət, müsəlmandır. Onun yaşadığı dövr Azərbaycan tarixinin silinməz səhifələridir. Çalışacağıq ki, filmdə bu tarixi təfərrüatı ilə tamaşaçıya çatdıraq. Bizim filmlərin sifarişçisi, bayaq qeyd etdiyim kimi, Azərbaycan Televiziyasıdır. Tam səmimi bildirmək istəyirəm ki, bizim ən böyük mükafatımız belə bir məsuliyyətli işi rəhbərliyin bizə etibar etməsidir. Bütün kollektivlə bu etibarı doğrultmağa çalışırıq.

Hər bir dövlət kanalında buraxılan xırda bir siyasi səhv dövlətə ciddi problem yaradır. Biz çalışırıq ki, fəaliyyət göstərdiyimiz vaxt ərzində daim dövlətimizin maraqlarına xidmət edək.

Son olaraq bildirmək istəyirəm ki, bu yaxınlarda Azərbaycan Televiziyasında müəyyən təqaüd yaşına çatmış əməkdaşların əmək müqaviləsinin şərtləri dəyişdirildi. Bundan sonra televiziyaya gələn cavanları görəndə çox sevindim. Məncə, nəsillərin qanuni formada dəyişməsi uğurlu addımdır. Bu səbəbdən, gənclərə bəslədiyi ümidlərə, onlara yaratdığı iş rejiminə görə AzTV rəhbərliyinə təşəkkürümü bildirirəm.

Ekran Efir.- 2007.- 18 may.- S. 4.