Anarın Türkiyədə daha bir əsəri ekranlaşdırılıb

İstanbulda xalq yazıçısı Anarın "Mən, sən, o və telefon" hekayəsi əsasında "Və telefon" adlı bədii film çəkilib (AzərTAc). İlk dəfə 1967-ci ildə Moskvada "Nedelya" həftəliyində dərc olunmuş bu hekayə qısa müddətdə dünyanın bütün əsas dillərinə – ingilis, alman, ispan, polyak, macar, bolqar, türk, ərəb, fars, yapon, fin, tacik, qazax, özbək, gürcü dillərinə çevrilərək nəşr edilib. Hekayə 1968-ci ilin dekabrında ABŞ-ın Nyu-York şəhərində çıxan "Nyu Yorld revyu" jurnalında, 1970-ci ildə Kanadada çap olunub. 1967-ci il oktyabrın 26-da Moskvanın Mərkəzi Televiziyası bu hekayə əsasında tamaşa göstərib (baş rollarda V.Beroyev və İ.Kartaşova). Hekayə Qahirə, Leninqrad, Xarkov, Krım televiziyalarında da səhnələşdirilərək tamaşaçılara təqdim edilib. "Mosfilm" kinostudiyasında bu hekayənin motivləri əsasında "Hər axşam 11-də" bədii filmi çəkilib (ssenari müəllifi Edvard Radzinski, rejissor Samson Samsonov, baş rollarda Marqarita Volodina və Mixail Nojkin). Kinoşünas və rejissor Ayaz Salayev "Mən, sən, o və telefon"un çox illər qabaq ABŞ-da və Kanadada nəşr edildiyini nəzərə alaraq, sonralar Hollivudda çəkilmiş "Sizə məktub var" filmində Anarın hekayəsinin motivlərindən istifadə olunduğunu güman edir. Bolqar dramaturqu Xristo Lojev həmin hekayə əsasında "Üçü və telefon" adlı pyes yazıb, o, 1983-cü ildə Razqrad dram teatrında Yükçəl Çauşev tərəfindən tamaşaya qoyulub. Azərbaycan televiziyası da bu hekayə əsasında "Telefon gecələri" adlı teletamaşa (rejissor Ramiz Həsənoğlu, baş rollarda Həsən Əbluc və Əminə Yusifqızı) göstərib. İndi Türkiyədə çəkilən bədii filmin rejissoru Nuran Evren Sifdir. Bu, Anarın qardaş ölkədə ekranlaşdırılan ikinci əsəridir. Bir il əvvəl TRT-1 kanalında yazıçının "Dantenin yubileyi" povesti əsasında çəkilmiş "Aktör eskisi" ("Köhnə aktyor") nümayiş etdirilib. "Və telefon" filmi yaxın günlərdə İctimai Televiziya ilə göstəriləcək

525-ci qəzet.- 2007.- 25 may.- S. 7.