“Bu gün Azərbaycanda xor sənəti inkişafdadır”

Əbülfəs Qarayev: "Bir il ərzində Azərbaycanda 50 uşaq musiqi kollektivi yaranıb"

Ötən gün Musiqili Komediya Teatrında Azərbaycan Respublikası Mədəniyyət və Turizm Nazirliyinin təşkilatçılığı ilə Uşaq musiqi və incəsənət məktəbləri xor kollektivlərinin 5-ci Respublika müsabiqəsinin yekun konserti keçirildi. Mərasimdə Mədəniyyət və Turizm naziri Əbülfəs Qarayev də iştirak edirdi.

Konsert başlamazdan öncə Əbülfəs Qarayevə söz verildi. Nazir müsabiqədə iştirak edən bütün musiqi məktəblərinin kollektivlərini salamladı. Çıxışında mərasim təşkilatçılarının əməyini yüksək qiymətləndirdi: "Ötən bir il olduqca maraqlı və nəzərəçarpacaq yeniliklərlə yadda qaldı. Sevinirəm ki, bu gün Azərbaycanda xor sənəti inkişafdadır. Bir il ərzində Azərbaycanda 50 uşaq musiqi kollektivi yaranıb. Bu, əlbəttə ki, sevindirici göstəricidir. Xatırladım ki, xor üçün yaranan əsərlər üçün də müsabiqə elan edilib. Bu da Azərbaycanda xor sənətinin inkişafına müsbət mənada təsirini göstərir. Mən bu müsabiqədə əməyi olan bütün insanlarla yanaşı, ilk növbədə xor kollektivləri ilə çalışan müəllimlərə minnətdarlığımı bildirirəm. Onların əməyi bu gün göz qabağındadır. Bu müsabiqədə 12 min uşaq iştirak edir. 12 min uşağın iştirakını təmin etmək müəllimlərdən böyük zəhmət tələb edib".

Daha sonra nazir müsabiqədə qalib olan musiqi kollektivlərinin müəllimlərinə mükafatlar təqdim etdi. Birinci yerə Mingəçevir şəhərindən İnna Lipkina layiq görüldü. Birinci yerin qalibinə 500 manat verildi. İkinci yerə Səidə Göyçayskaya, Məhim Orucov, Teymur Cəbrayılov layiq görüldülər. Onların də hər birinə 400 manat pul mükafatı verildi. Üçüncü yerə Elmira Mansurova, Validə Cəlilova, Nəzakət Mövsümzadə layiq görüldülər. Onların da hər birinə 200 manat pul mükafatı verildi. Müsabiqədə həmçinin həvəsləndirici mükafatlar da verildi. Zemfira Budullayeva, İradə Cəlilova və Aygün Məmmədova 100 manat məbləği ilə həvəsləndirici mükafatın sahibi oldular. Müsabiqədə yüksək səviyyədə çıxışlarına görə birinci dərəcəli mükafat Mingəçevir şəhər Üzeyir Hacıbəyov adına uşaq musiqi məktəbinə verildi. İkinci yerin sahibi Bakı şəhər 2 nömrəli uşaq musiqi məktəbi və 3 nömrəli musiqi məktəbi oldu. Üçüncü yerə Naxçıvanın Ordubad şəhərinin musiqi məktəbinin kollektivi layiq görüldü.

Yekun konsertində həmçinin müsabiqə iştirakçılarına fəxri fərmanlar da təqdim olundu. Bakı şəhər Fikrət Əmirov adına 6 nömrəli musiqi məktəbi, Rastropoviç adına 2 nömrəli 11 illik uşaq musiqi məktəbi, Bakı şəhəri Babayev adına I 25 nömrəli musiqi məktəbi, Bakı şəhəri I 96 nömrəli musiqi məktəbi, Gəncə şəhəri uşaq-incəsənət musiqi məktəbi, Neftçala uşaq musiqi məktəbi, Sumqayıt şəhər Bülbül adına 2 nömrəli uşaq musiqi məktəbi, Şəki şəhərindən 2 və 4 nömrəli musiqi məktəblərinin kollektivi, həmçinin Xocalı şəhər 1 nömrəli uşaq musiqi məktəbinin kollektivi fəxri fərmanla mükafatlandırıldılar. Təqdimat mərasimi bitdikdən sonra isə mərasimin bədii hissəsinə start verildi.

Konsertdə uşaq musiqi və incəsənət məktəblərinin şagirdlərinin iştirakı ilə xor kollektivlərinin 5-ci Respublika müsabiqəsinin konserti təqdim olundu. Gecədə Üzeyir Hacıbəyovun "Zəfər himni"ni Bakı şəhəri Rəşid Behbudov adına UMM-in xoru təqdim etdi. Xormestr Səidə Göyçayskaya, konsertmestr Ramina Kazımova idi. "Süsən sünbül" xalq mahnısını isə Bakı şəhər H.Sarabski adına 7 nömrəli UMM-in xor kollektivi ifa etdi. Kollektivin xormestri Xalidə Cəlilova, konsertmestri Nizami Əliyev idi. Kollektivin solisti Tamerlan İsgəndərov idi. Gecədə həmçinin digər qaliblərin ifasında da xor musiqisi səsləndi.

Şərq.- 2007.- 16 may.- S. 14.