Evrovisionda iştirak etməməyimiz faciə deyil

Əbülfəs Qarayev: Bu müsabiqə incəsənətə deyil, siyasətə xidmət edir

“Quba rayonunun Tarix-Diyarşünaslıq Muzeyində xüsusi bir bölmələr ayrılmalı oradakı kütləvi məzarlıqlarda tapılan qalıqlar bir araya gətirilməlidir. Ermənilər tərəfindən törədilmiş faciə faktlarının hamısını bir yerdə toplamağa ehtiyac yoxdur. Çünki Azərbaycan bir çox rayonlarında ermənilər tərəfindən törədilmiş cinayətlər sübut oluna bilər”. Bu fikirləri jurnalistlərlə söhbətində mədəniyyət və turizm naziri Əbülfəs Qarayev bildirib. Nazirin sözlərinə görə, tapılmış məzarlıq Azərbaycanın ümumi tarixinə aid olan hadisədir və buna görə də onun qorunmasına ehtiyac var: “Bu tapıntılar davam etdirilir və fikrimcə, bunları bir məkanda toplamaq lazım deyil. Hər bir rayonun özünə aid faciələri əks etdirən xüsusi yerlər olmalıdır”.

Bir sıra tarixi mədəniyyət abidələrimizin ermənilər tərəfindən dağıdılması ilə bağlı məsələyə gəldikdə isə nazir deyib ki, ümumiyyətlə Qarabağla bağlı tarixi həqiqətlərin, tarixi mədəniyyət abidələrimizin ermənilər tərəfindən dağıdılması ilə bağlı məlumatların dünyaya çatdırılması istiqamətində işlər aparılır. Mədəniyyət və Turizm Nazirliyi və digər dövlət orqanlarının xətti ilə bu mövzuda dörd-beş dildə bukletlər, toplular, nəşrlər hazırlanır və bunlar müxtəlif beynəlxalq səviyyələrdə təqdim olunacaq. Heydər Əliyev Fondunun rəhbəri Mehriban Əliyevanın təşəbbüsü ilə hazırlanan “Staraya Şuşa” kitabının hazırda rus dilindən Azərbaycan dilinə tərcümə edildiyini deyən nazir Qərbi Azərbaycanın memarlıq abidələri haqqında 5 dildə kitab nəşr etdirdiklərini də vurğulayıb. Dünya ölkələrində və ermitajlarda Azərbaycana aid tarixi abidələrin Qarabağ xanlığı adından təqdim olunmasına gəldikdə, nazir bu istiqamətdə lazımi danışıqların aparıldığını qeyd edib: “Ümumi razılıq belədir ki, bu adın göstərilməsi ilə yanaşı, eyni zamanda çərçivədə “Müasir Azərbaycan Respublikasına aid olan tarix” qeyd olunsun”. Ə. Qarayev mayın 28-də Luvr muzeyinin rəhbərinin ilk dəfə Azərbaycana gələcəyini də bildirib.

Son günlərin ən çox müzakirə olunan mövzusu azərbaycanlı müğənnilərin “Evrovision” musiqi festivalında iştirak etməməsinə də toxunan Ə.Qarayev deyib ki, bunu çox da şişirtmək düzgün deyil. Biz elə yerlərdə iştirak edirik ki, bir çoxları oraya gedə bilmir. Ona görə də “Evrovision”da iştirak etməməyimiz faciə deyil. Bu yarışmada iştirak etmək üçün hazırlaşmağın böyük bir proses olduğunu deyən nazir hesab edir ki, Azərbaycan bu müsabiqəyə çıxırsa, o zaman layiqli çıxmalıdır. “Evrovision”da Mədəniyyət və Turizm Nazirliyinin dəstəyi ilə ekspert kimi iştirak etmiş Rəşad Həşimov və Murad Dadaşovla görüşdüyünü bildirən nazir bu yarışın böyük bir siyasi əhəmiyyətə malik olduğunu vurğulayıb: “Çox təəssüflər olsun ki, bu müsabiqə incəsənətə deyil, siyasətə xidmət edir. Hazırda Rəşad və Murad yarışmada iştirak üçün layihələrin hazırlanmasına dair təklifləri hazırlayıb bizə təqdim edəcəklər. Bundan sonra biz mütəxəssislərlə məsləhətləşəcəyik. Mənə elə gəlir ki, bu gün 2008-ci ildə yarışmaya qatılacağımızı demək düzgün olmaz. Bir-iki il gözləmək lazımdır. Bəlkə də daha üstün müsabiqədə iştirak edəcəyik. Avropa məkanında müxtəlif formalarda göstərilən incəsənət adı altında müsabiqələr çoxdur. Bu gün Azərbaycan dünyanın bir sıra müsabiqələrində iştirak edib. Mütləq deyil ki, biz yalnız “Evrovsion”da iştirak edək, ancaq başqa yerə getməyək”.

Yeni Azərbaycan.-2007.-19 may.-S.12.