Musiqi məktəbləri arasında Respublika müsabiqəsi qaliblərinin konserti

Mayın 17-də Bakı şəhər H.Sarabski adına 7 nömrəli musiqi məktəbində Mədəniyyət və Turizm Nazirliyinin təşkilatçılığı ilə uşaq musiqi və incəsənət məktəbləri şagirdlərinin simli, nəfəs və zərb alətləri üzrə Respublika müsabiqəsi qaliblərinin konserti olmuşdur.

Mədəniyyət və Turizm naziri Əbülfəs Qarayev qalibləri təbrik etmiş və bildirmişdir ki, belə müsabiqə ölkəmizdə ilk dəfə keçirilir. Bu tədbir həm də onunla əlamətdardır ki, müsabiqə həm xalq, həm simfonik musiqimizin inkişafına xidmət edəcəkdir.

Müsabiqə respublikanın 60 şəhər və rayonunu əhatə etmişdir. Şagirdlərdən 70 nəfəri simli, 120 nəfəri isə nəfəsli və zərb alətləri üzrə yarışmışlar.

Ə.Qarayev uşaqların müsabiqəyə hazırlanmasında yaxından iştirak etdiklərinə görə musiqi məktəbləri müəllimlərinə təşəkkür etmişdir.

Axırda müsabiqə qaliblərinə pul mükafatları və diplomlar təqdim olunmuşdur.

Respublika.- 2007.- 18 may.- S.8.