Dövlətimizin başçısı zəmanəmizin görkəmli musiqiçisi maestro Mstislav Rostropoviçin dəfn mərasimində iştirak etmişdir

Xəbər verdiyimiz kimi, Azərbaycan Respublikasının Prezidenti İlham Əliyev zəmanəmizin görkəmli musiqiçisi maestro Mstislav Rostropoviçin dəfn mərasimində iştirak etmək üçün aprelin 28-də Moskvaya getmişdir.

Azərbaycan dövlətinin başçısı və xanımı Mehriban Əliyeva aprelin 29-da böyük musiqiçinin ruhuna dua oxunması mərasiminin keçirildiyi Xilaskar İsa Məsih kilsəsinə gəldilər. Prezident İlham Əliyev və xanımı Mstislav Rostropoviçin həyat yoldaşı Qalina Vişnevskayaya, mərhumun doğmaları və yaxınlarına dərin hüznlə başsağlığı verdilər, onların kədərinə şərik olduqlarını bildirdilər.

Dövlətimizin başçısı və xanımı mərhumun tabutu yanında dayanaraq, görkəmli həmyerlimizə son borclarını verdilər.

Böyük musiqiçinin xatirəsini yad etməyə gələn insan axınının ardı-arası kəsilmirdi. Xilaskar İsa Məsih kilsəsinə dua mərasiminə gələnlər arasında İspaniya kraliçası Sofiya tanınmış incəsənət, siyasət, elm xadimləri vardı. Dünya musiqi tarixində silinməz iz qoymuş Mstislav Rostropoviç parlaq, hərtərəfli şəxsiyyət, əsl dünyamiqyaslı insan idi. Onun uçurulmuş Berlin divarı yanında violonçeldə ifası, habelə 1991-ci ilin avqustunda QKÇP-yə qarşı etirazı məşhur musiqiçinin humanist mövqeyinin, onun despotizmlə barışmazlığının sübutudur.

Bakılı Mstislav Rostropoviç azərbaycanlıların yaddaşında dost kimi qalmışdır. Azərbaycanın yaradıcı gənclərinə daim kömək etmiş, geniş xeyriyyəçilik fəaliyyəti ilə məşğul olmuş, uşaqların sağlamlığının qorunmasına yönəlmiş humanitar proqramları dəstəkləyən insanı ölkəmizdə məhz belə adlandırırlar. Prezident İlham Əliyevin Qalina Vişnevskayaya ünvanladığı başsağlığı teleqramında deyilir: "Mstislav Rostropoviç, həqiqətən, dünya vətəndaşı, görkəmli ictimai xadim, humanizmin və ümumbəşəri dəyərlərin ülvi amallarını həmişə və hər yerdə qoruyan ən yüksək mənəviyyata malik insan olmuşdur. O, bizim xatirəmizdə həmişə parlaq, qeyri-adi şəxsiyyət, gözəl, son dərəcə cəzbedici və xariqüladə bir insan kimi qalacaqdır. Bizim hamımıza ağır, əvəzsiz itki üz vermişdir".

Azərbaycan dövlətjnin başçısı və xanımı həmin gün Mstislav Rostroppviçin Novodeviçye qəbiristanlığında dəfn mərasimində iştirak etdi. Onlar böyük musiqiçini son mənzilə yola salaraq məzarına torpaq tökdülər. Qalina Vişnevskayaya bir daha başsağlığı verdilər.

Prezident İlham Əliyev və xanımı Mehriban Əliyeva sonra Rusiyanın birinci Prezidenti Boris Yeltsinin məzarını ziyarət edərək gül qoydular, görkəmli dövlət və siyası xadimin maestro Mstislav Rostropoviçin dəfn mərasimində iştirak edən xanımı Naina Yeltsinaya da başsağlığı verdilər.

Azərbaycan dövlətinin başçısı Rusiyanın tanınmış jurnalisti, təyyarə qəzasında həlak olmuş Artyom Borovikin də, məzarını ziyarət edərək gül qoydu.

Azərbaycan.- 2007.- 1 may.- S. 2.