Mürvətqızı S.

Şuşanın işğalının 15-ci ildönümü anılıb

"Azərsun Holdinq"in Mədəniyyət Mərkəzində Elçinin "Şuşa dağlarını duman bürüyüb" tamaşası nümayiş olunub

Dünən "Azərsun Holdinq"in Mədəniyyət Mərkəzində Şuşanın ermənilər tərəfindən işğalının 15 illiyinə həsr edilmiş "Bu qala bizim qala" adlı anım mərasimi keçirildi. Mərasimdən əsas məqsəd qan yaddaşımızın çox ağrılı bir səhifəsinə yenidən nəzər salmaq, Şuşanın hələ də erməni tapdağında olduğunu bir daha xatırlamaq idi. İkihissəli tədbirin 1-ci bölümündə giriş sözüylə çıxış edən layihənin rəhbəri E.Abdullayeva Şuşanın Azərbaycan xalqı üçün müqəddəs məkan olduğunu önə çəkdi. Sonra Şuşanın əvvəlki və indiki durumunu əks etdirən kadrlar nümayiş olundu. "Azərsun Holdinq" Şirkətlər Qrupunun prezidenti Abdulbari Goozal çıxışında Şuşanın və ümumiyyətlə işğal altında olan Azərbaycan torpaqlarının geri alınacağına güclü inam bəslədiyini və o günün uzaqda olmadığını vurğuladı. Şuşa rayon İcra Hakimiyyəti başçısının müavini Ramiz Qasımov anım tədbirinin keçirilməsinə görə mərasimin təşkilatçılarına bütün şuşalılar adından təşəkkür etdi. Tarixi proseslərə nəzər salan R.Qasımov torpaqlarımızın o dövrdəki siyasi çaxnaşmaların nəticəsində işğal edildiyini, lakin bu vəziyyətin müvəqqəti olduğuna, dədə-baba yurdlarımızın mütləq geri alınacağına əminliyini dilə gətirdi. İncəsənət Muzeyinin elmi işlər üzrə direktor müavini Elmira Qasımova erməni işğalçılığının əsl mahiyyəti, bədnam qonşularımızın iç üzü barədə fikirlərini söylədi: "İşlədiyim muzeyin həyətində hər gün Üzeyir bəyin, Bülbülün, Natəvanın güllələnmiş heykəlləri ilə üzləşirəm. Bu hər bir azərbaycanlı üçün ağır sınaqdır, ancaq bu sınağın tezliklə bitəcəyinə ürəkdən inanıram". Şuşa Dövlət Musiqili Dram Teatrının direktoru Yadigar Muradov bu müqəddəs şəhərlə bağlı teatrı qoruyub yaşatdıqlarını, Şuşanın azad ediləcəyi günü səbirsizliklə gözlədiklərini bildirdi. Sonda Şuşa Teatrının ifasında Xalq yazıçısı Elçinin "Şuşa dağlarını duman bürüyüb" tamaşası nümayiş etdirildi.

525-ci qəzet.-2007.-5 may.-S.24.