Milli Dram Teatrı Trabzondan qayıtdı

Məlum olduğu kimi, Akademik Milli Dram Teatrı mayın 1-dən 6-dək Trabzonda keçirilmiş VIII Beynəlxalq Qara dəniz Teatr Festivalında iştirak edib. Teatr Bəhram Osmanovun quruluşunda "Kaş araba aşmayaydı..." tamaşasını nümayiş etdirib. Teatrdan aldığımız məlumata görə, festivalda rejissor işi və aktyor oyunu yüksək qiymətləndirilib və teatr festivalın iki mükafatına layiq görülüb. Trabzon Bələdiyyə Başqanlığı Akademik Milli Dram Teatrının ən yaxşı tamaşa üçün təsis etdiyi mükafatla təltif edib. Qeyd edək ki, tamaşada əsas rolları Səyavuş Aslan, Bəsti Cəfərova, Telman Əliyev, Əjdər Həmidov, Anar Heybətov və başqaları ifa ediblər. Türkiyə Kültür Bakanlığının təşkilatçılığı və Azərbaycan Mədəniyyət və Turizm Nazirliyinin dəstəyilə təşkil olunan festival qardaş ölkələr arasında mədəni əlaqələrin inkişafında mühüm addım kimi qiymətləndirilib.

Ayna.- 2007.- 12 may.- S. 18.