Təranə

Teatr priz alıb

Akademik Milli Dram Teatrı Trabzonda keçirilən 8-ci Beynəlxalq Qara Dəniz Teatr Festivalından qayıdıb. Teatrın mətbuat xidmətindən verilən məlumata görə, mayın 1-dən 16-dək keçirilən festivalda kollektiv Bəhram Osmanovun quruluşunda Otia İoselianinin "Kaş araba aşmayaydı!.." tamaşası ilə iştirak edib. Baş rolları respublikanın Xalq artistləri Səyavuş Aslan, Bəsti Cəfərova, Əməkdar artistlər Mətanət Atakişiyeva, Münəvvər Əliyeva, Telman Əliyev, Əydər Həmidov, Sevinc Əliyeva, aktyorlardan Abbas Qəhrəmanov, İradə Həsənova, Məzahir Cəlilov, Vəfa Rzayeva və Anar Heybətov ifa ediblər. Məlumata görə, tamaşanın nümayişi rəğbətlə qarşılanıb və ümumilikdə tamaşa festivalın bəzəyi kimi qiymətləndirilib.

Festivalın təşkilatçıları - dramaturq Tuncer Cücenoğlu, quruluşçu reyissor Ensar Qılınc, sənətşünas Həyati Asilyazıçı və Trabzon Bələdiyyə Başkanı Volkan Canalıoğlu bütövlükdə Azərbaycan teatrının böyük uğurunu qeyd ediblər. Festivalda reyissor işi və aktyor oyunu yüksək qiymətləndirilib və festivalın iki prizinə layiq görülüb. Bundan əlavə, Trabzon Bələdiyyə Başqanının ən yaxşı tamaşa üçün təsis etdiyi priz də Akademik Milli Dram Teatrına təqdim edilib.

Qeyd edək ki, Türkiyə Kültür Bakanlığının təşkilatçılığı və Azərbaycan Mədəniyyət və Turizm Nazirliyinin dəstəyi ilə təşkil olunan bu festival qardaş ölkələr arasındakı mədəni əlaqələrin inkişafında mühüm addım kimi dəyərləndirilib.

Kaspi.-2007.-11 may.-S.17.