Turanə
Tamaşalarımız
festivalların bəzəyidir
Maqbet
Bünyadov: Çoxdan idi ki, belə alqışlar
görməmişdik
Bu yaxınlarda
Türkiyədən qayıdan Akademik Milli Dram Teatrının
kollektivi yenidən səfərə hazırlaşır.
Teatrın binasının təmirə dayandırılması
ərəfəsində yaradıcı kollektiv gərgin
fəaliyyətdədir.
Kollektivin qardaş
Türkiyədə olan uğurlarından danışan
teatrın baş direktoru Maqbet Bünyadov bizimlə
səfər təəssüratlarını
bölüşdü. M.Bünyadov əvvəlcə
ötən il ərzində teatrın əldə etdiyi
uğurlardan söhbət açdı. Elçinin “Qatil”
əsəri ilə Kazanda, Ufa şəhərində
keçirilən festivalda, Türkiyənin Açıq
Məkan Teatrında çıxış edən kollektivin
ifası tamaşaçılar tərəfindən
böyük maraqla qarşılandığından
əsəri Türkiyədə də
səhnələşdiriblər.
Teatrın ötən il
əldə etdiyi daha bir uğuru isə Bəhram Osmanovun
quruluşunda səhnələşdirilən eksperimental
rejissor işi olan Dostoyevskinin “Cinayət və cəza”
tamaşası oldu. Bu səhnə əsəri Misirdə
keçirilən festivalda böyük maraqla
qarşılanıb. Bu ay Trabzonda keçirilən 8-ci
Beynəlxalq Qaradəniz Teatr Festivalı da teatrın
nailiyyətləri siyahısına əlavə olundu. Maqbet
Bünyadov dedi ki, festivalda bütün teatr kollektivləri eyni
cür qarşılansa da, sonda bizlərə
münasibətləri dəyişib: “Hamı böyük
həyəcanla öz çıxışını
gözləyirdi. Festivala bizimlə yanaşı Fransa,
Makedoniya, İran, Rusiya, Ukrayna, Gürcüstan və başqa
ölkələrin kollektivləri qatılmışdı.
Festivalın ilk günü türk xalqının öndəri
M.K.Atatürkün məqbərəsi ziyarət olundu.
Mərasimdə türk vali və bələdiyyə
başqanları ilə tanış olmaq imkanı qazandım.
Onları tamaşaya baxmağa dəvət etdim.
Çıxış edəcəyimiz gün Trabzonsporun
Futbol turniri də var idi. Bələdiyyə sədrləri
yarışa getmək istəyirdilər. Təkid etdim ki,
futbolunuza hər zaman baxmaq imkanınız var, yaxşı
olardı ki, bu gün tamaşamızı seyr etməyə
üstünlük verəsiniz. Teatrın səhnəsi bir
gün bizim öhdəmizə verildi. Səhnə
alışdığımız genişlikdə deyil,
kiçik olsa da, texniki işçilərimiz gözəl
tərtibat hazırladı”.
“Kaş araba
aşmayaydı” tamaşasının festival
təşkilatçılarının istəyi ilə
seçildiyini söyləyən baş direktor quruma
əvvəlcədən teatrın repertuarında olan 5-6
səhnə əsərinin CD-nin göndərildiyini
vurğuladı. M.Bünyadov festivalın əsas meyarının
teatrın səviyyəsi, aktyor oyunu və rejissorun quruluş
keyfiyyətindən ibarət olduğunu söylədi.
Festival
çərçivəsində səfərlərinin də
maraqlı keçdiyini deyən baş direktor bildirdi ki,
kollektiv səfərə avtobusla çıxmışdı.
Turnedə bölgələrimizdə qonaq olan kollektiv
Kürdəmir, Qazax ziyalıları və ağsaqqalları
ilə də görüşüb.
Tamaşanın ilk
dəqiqələrində böyük həyəcan
yaşadıqlarını deyən Maqbet müəllim
çox çəkmədən həm səhnəni, həm
də tamaşaçıları ələ aldıqlarını
söylədi. Tamaşaçılar nəinki Siyavuş Aslan
və Bəsti Cəfərovanın, bütün aktyorların
ifasına heyran qalıblar. Tamaşanın sonunun onlar üçün
gözlənilməz olduğunu söyləyən baş
direktor çoxdan idi ki, belə coşqu
görmədiklərini də etiraf etdi:
“Tamaşaçılar aktyorlarımızı ayaq üstə
alqışlayaraq səhnədən buraxmaq istəmirdilər.
Hər bir yaradıcı insan üçün bu cür
alqışlar əvəzolunmaz, xoş hisslər,
gözəl təsir bağışlayır. Bizi festivalın
prizi ilə elə həmin gün mükafatlandırdılar.
Biz də öz növbəmizdə əliboş
getməmişdik. Özümüzlə xəritəmizi,
milli-mədəni dəyərlərimizi əks etdirən
suvenirlər aparmışdıq. Həmin gün türk vali
və bələdiyyə başqanlarının dəstəyi
ilə ziyafət təşkil olundu. Gecədə
vurğulandı ki, Azərbaycandan olan teatr kollektivinin
nümayiş etdirdiyi tamaşa festivalın bəzəyi idi.
Ən gözəl aktyor oyununa görə isə Xalq artisti
Siyavuş Aslan mükafatlandırıldı”.
M.Bünyadov teatrın
planlarından da danışdı. O, bildirdi ki, yaxın
gələcəkdə teatrın Gürcüstana və Kayseri
şəhərinə səfərləri nəzərdə
tutulub. Türkiyədə keçiriləcək Türk
Dünyaları Teatrlar Festivalına dəvət alan
kollektivə Mədəniyyət və Turizm Nazirliyi
dəstək olarsa, o zaman iyunun 8-9-da teatrın yenidən
Türkiyəyə səfəri gözlənilir. M.Bünyadov
bildirdi ki, teatr respublikamızın bölgələrinə
də səfər edəcək. Mayın 20-dən sonra
kollektiv Ağdaş, Göyçay, Kürdəmir, Yevlax
və Zərdab tamaşaçılarını
sevindirəcək. Mayın 22-də isə əməkdar
incəsənət xadimi Bəhram Osmanovun quruluşunda Stefan
Sveyqin “Tənha qadının məktubu” əsəri
tamaşaçıların ixtiyarına veriləcək.
Amerikanın ölkəmizdəki səfirliyilə iş birliyində
olan Akademik Milli Dram Teatrı Artur Millerin “Körpüdən
mənzərə” tamaşasını mövsümün
sonuna kimi təhvil verəcək. Xatırladaq ki, tamaşa Xalq
artisti Mərahim Fərzəlibəyovun quruluşunda
səhnələşdirilir.
Yeni Azərbaycan.-2007.-18 may.-S.8.