Anri Luaret İçərişəhər qədim mədəniyyətə malik bir xalqın canlı tarixidir

Fransanın Luvr muzeyinin direktoru Anri Luaret mayın 29-da Azərbaycan Dövlət İncəsənət Muzeyi ilə tanışlıqdan və İçərişəhərdə gəzintidən sonra bu sözləri AzərTAc-ın müxbirinə demişdir.
Muzeyin eksponatlarına, əl işlərinə əsl peşəkar rəssam marağı ilə tamaşa edən Anri Luaret burada milli koloritli rəsmlərlə birlikdə bir çox Avropa rəssamlarının da əl işlərinin böyük diqqət və qayğı ilə qorunub saxlanmasından, nümayiş etdirilməsindən məmnun qaldığını bildirdi.
Qonaq İçərişəhərdə gördüyü hər şeylə maraqlanır, xalçaçılıq, xalq tətbiqi sənəti nümunələri, tarixi binaların memarlıq elementləri barədə suallar verir, ətraflı məlumat almağa çalışırdı. O, əsrlərin yadigarı olan Qız qalasının möhtəşəm arxitekturası, bu nadir abidənin tarixi ilə maraqlandı.
Karvansarada qədim musiqi alətləri ansamblının çıxışını maraqla dinləyən qonaq Şirvanşahlar sarayına, tarix muzeyinə də xüsusi diqqət göstərdi. Etnoqrafiya, xalq sənəti və memarlığa dair dərin biliyə malik olduğu dərhal hiss edilən A.Luaret Azərbaycan haqqında oxuduqlarının, eşitdiklərinin səfər çərçivəsində əyani şahidi olduğunu, xalqımızın dini tolerantlığını, ölkəmizin Şərq-Qərb sivilizasiyasının qovuşduğu çox nadir bir məkanda yerləşdiyini xüsusi vurğuladı. Hörmətli qonaq muzey əməkdaşları ilə söhbətlərində Bakını, İçərişəhəri, xalqımızı həmişə məhəbbətlə xatırlayacağını bildirdi, bu abidə və muzeylərlə tanışlıqdan son dərəcə məmnunluğunu qeyd edərək İçərişəhərin qədim mədəniyyətə malik bir xalqın canlı tarixi olduğunu vurğuladı.
Luvr muzeyinin direktoru Anri Luaretə xatirə hədiyyələri təqdim edildi.

Azərbaycan.-2007.-30 may.-S.4.