BMT-nin Cenevrədəki bölməsinin iqamətgahında "Azərbaycan otağı"nın açılışı

BMT-nin Cenevrədəki bölməsinin Baş direktoru Sergey Orconikidzenin çıxışı

- Hörmətli xanım Əliyeva!
Xanımlar və cənablar!
Millətlər Sarayında "Azərbaycan otağı"nın açılış mərasimində sizi salamlamaqdan məmnunluq duyuram.
Biz bu konfrans otağının təmiri, dizaynı və təchizinə görə Azərbaycan hökumətinə və xalqına təşəkkürümüzü bildiririk. Bu otaq BMT-nin fəaliyyətinə əməli töhfədən xəbər verir və Azərbaycanın bu təşkilata tam sadiqliyini aydın şəkildə nümayiş etdirir.
Bildiyiniz kimi, bizim əsas binamız 1936-cı ildən etibarən istifadədədir və üzv dövlətlərin tələbatlarını yerinə yetirmək məqsədi ilə burada təmir-bərpa işləri davam etdirilir.
Beləliklə, bu hədiyyə Millətlər Sarayından istifadə edən bütün şəxslər üçün təhlükəsiz iş yerlərinin və adekvat şəraitin davamlı şəkildə təmin edilməsinə verilən çox qiymətli töhfədir.
Xanım Əliyeva, Sizin burada olmağınız bizim üçün böyük şərəfdir və biz Sizə şəxsən öz səmimi minnətdarlığımızı bildiririk.
Bu otağın açılması Azərbaycanın zəngin irsinin bariz nümunəsidir. Siz ölkənizin mədəniyyətini bütün dünyada təşviq etmək üçün böyük işlər görmüsünüz.
Siz, eyni zamanda, dünyadakı müxtəlif mədəniyyətlər arasında qarşılıqlı anlaşmanın və onlara dözümlülük əsasında yanaşmanın böyük tərəfdarısınız. Bu baxımdan, Sizin YUNESKO-nun xoşməramlı səfiri kimi rolunuzu da xüsusilə qeyd etmək lazımdır.
Bütün bunlar fəaliyyətinizin nəticəsidir və öz mədəniyyətinizə hörmətlə yanaşmağınız digər adət-ənənələrə də hörmət və ehtiramın möhkəm əsası ola bilər.
Gördüyünüz kimi, bu otaq nəinki yaxşı dizayna malikdir, həm də lazımi qaydada təchiz olunubdur. Bilirəm ki, öz ölçüsünə, yerinə və məqsədəuyğunluğuna görə bu otağa tələbat çox olacaqdır. Otaq artıq üzv dövlətlərin üzünə açıqdır.
Əslində, Dünya Səhiyyə Assambleyasının sessiyası ilə bağlı bir çox görüşlər burada keçirilmiş və Azərbaycanın səhiyyə sahəsində göstərdiyi səylər lazımınca qiymətləndirilmişdir.
Bu cür xeyirxah hədiyyəyə və BMT-nin xüsusi orqanlarının işinə sədaqətlə yanaşdığına görə Azərbaycan hökumətinə və xalqına bir daha minnətdarlığımı bildirirəm.
Əminəm ki, bu otaqda aparılan iş təşkilatın gündəlik fəaliyyətinə böyük töhfə verəcəkdir.
Ümid edirəm ki, Azərbaycanın nümunəsi digər üzv dövlətləri, burada iştirak edən səfirləri BMT-nin işini lazımi dərəcədə dəstəkləmək üçün eyni addımları atmağa sövq edəcəkdir. Çox sağ olun.
Sonra Mehriban Əliyeva mərasimdə çıxış etdi.

Azərbaycan.-2007.-22 may.-S.2.