Quliyeva Z.

Əfqan xalqının həyatını əks etdirən sərgi keçirildi

Azərbaycan Dövlət Mədəniyyət və İncəsənət Universitetinin əsas binasında əfqan xalqının həyatını əks etdirən bir-birindən maraqlı, zəngin foto-sərgi keçirilib. Həmyerlimiz Hacıəmi Atakişiyevin və onun əfqan həmkarı Fərid Niyazi, iranlı məşhur fotoqraf Əli Eşqinin bu sənət ocağına ərməğan etdikləri fotolar, sözün əsl mənasında, onların sənət uğurları idi.
Universitetin prorektoru Rafiq Sadıqov Azərbaycan Dövlət Mədəniyyət və İncəsənət Universitetində belə tədbirlərin keçirilməsini respublikamızda aparılan məqsədyönlü siyasətin davamı kimi səciyyələndirdi. İstər əfqanıstanlı fotoqraf Fərid Niyazinin, istər iranlı Əli Eşqinin, istərsə də həmyerlimiz Hacıəmi Atakişiyevin foto-sərgilərini bir motivin birləşdirdiyini, 2004-cü ildən bəri nisbətən dinc həyata qovuşan, uğurlu parlament seçkiləri keçirməyə nail olmuş əfqan vətəndaşlarının gələcəyə olan inamlarını əks etdirdiyini söylədi.
Tədbirin digər əcnəbi iştirakçıları da hər bir fotonu ayrı-ayrılıqda şərh edərək fikir və mülahizələrini bölüşdülər. Bu mənada serbiyalı Tomislav Petemi, kanadalı Daniel, rusiyalı İqor Muxin, fransalı qonaq Yeva Marqaretinin fikirləri daha yaddaqalan idi. Üç müxtəlif üslublu sənətkarın fotosu içərisindən seçilmiş 20 ədəd əsər sərginin "Azadlığa aparan yollar" devizinə cavab verməklə universitetin tələbələrində, xüsusən fotoqraf ixtisasına yaxın sənətlər üzrə təhsil alan gələcəyin rejissoru, operatoru, rəssamı olacaq gənclərdə böyük maraq doğurdu.

Azərbaycan.- 2007.- 25 may.- S. 8.