Minskdə MDB-yə üzv ölkələrin Mədəni Əməkdaşlıq Şurasının XXII iclası öz işinə başlamışdır

Mayın 21-də Minsk şəhərində MDB-yə üzv ölkələrin Mədəni Əməkdaşlıq Şurasının XXII iclası öz işinə başlamışdır.
Şuranın sədri, Azərbaycan Respublikasının mədəniyyət və turizm naziri Əbülfəs Qarayevin rəhbərliyi ilə keçirilən iclasda bir sıra məsələlər, o cümlədən dövlətlərarası mədəni münasibətlərin vəziyyəti və təşkilata daxil olan ölkələr arasında mədəni əməkdaşlığın fəaliyyət mexanizmlərinin müasirləşdirilməsi məsələləri müzakirə ediləcəkdir.
Rusiya Federasiyasının Mədəniyyət və Kinematoqrafiya Agentliyinin saytında verilən məlumata əsasən, mədəniyyət və turizm sahəsində yüksək səviyyədə mütəxəssislərin hazırlanması və mübadilələrin aparılması üçün MDB-yə üzv ölkələrin informasiya bölməsinin yaradılması, iştirakçı dövlətlərin Humanitar əməkdaşlıq haqqında sazişin həyata keçirilməsi də gündəlikdə duran məsələlərdəndir.
Azərbaycan tərəfinin şuranın növbəti iclasında müzakirə olunmaq üçün bir sıra təkliflərlə çıxış edəcəyi nəzərdə tutulur.

Xalq qəzeti.-2007.-22 may.-S.4.