Mehriban Əliyeva İsveçrədəki soydaşlarımızla görüşüb

AzərTAc. Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva Cenevrəyə səfəri çərçivəsində İsveçrədə işləyən və təhsil alan soydaşlarımızın bir qrupu ilə görüşüb. Azərbaycanın İsveçrə və Vatikandakı səfiri, BMT-nin Cenevrədəki bölməsində və digər beynəlxalq təşkilatlar yanında daimi nümayəndəsi Elçin Əmirbəyov görüş iştirakçıları barədə Mehriban Əliyevaya məlumat verib. Görüşdən məmnunluq duyduğunu söyləyən Mehriban xanım xarici ölkələrdə çoxlu sayda azərbaycanlı mütəxəssislərin çalışdığını və gənclərin təhsil aldığını bildirib. Son illər ölkəmizin iqtisadiyyatının sürətlə inkişaf etdiyini, əhalinin yaşayış səviyyəsinin xeyli yaxşılaşdığını xatırladan Azərbaycanın birinci xanımı respublikamız haqqında həqiqətlərin dünyaya, o cümlədən avropalılara çatdırılmasında xaricdəki soydaşlarımızın böyük qüvvə olduğunu xüsusi vurğulayıb. Gənclərin xarici ölkələrdə təhsil almasından danışan Mehriban Əliyeva bildirib ki, Azərbaycan Prezidenti bu məsələyə böyük diqqət yetirir və xüsusi sərəncam imzalayıb. Yüksək səviyyəli mütəxəssislər yetişdirmək məqsədi ilə gələcəkdə minlərlə azərbaycanlı gənc xarici ölkələrdə təhsil almağa göndəriləcək və dövlət onlara hərtərəfli qayğı göstərəcək.

Daha sonra Mehriban Əliyevanın şərəfinə mayın 18-də Cenevrədə ziyafət verilib. Ziyafətdə Dünya Səhiyyə Təşkilatının baş direktoru Marqaret Çan, Dünya Səhiyyə Assambleyasının 60-cı sessiyasının sədri, Avstraliyanın səhiyyə naziri Ceyn Halton, BMT-nin Cenevrədəki bölməsinin baş direktoru Sergey Orconikidze, BMT-nin İnsan Hüquqları üzrə ali komissarının müavini Kunq Van Kanq, BMT-nin Avropa üzrə İqtisadi Komissiyasının icraçı direktoru Marik Belka, beynəlxalq təşkilatların rəhbərləri və akkreditə olunmuş diplomatik korpusun nümayəndələri iştirak ediblər. Azərbaycanın İsveçrə və Vatikandakı səfiri, BMT-nin Cenevrədə bölməsi və digər beynəlxalq təşkilatlar yanında daimi nümayəndəliyinin rəhbəri Elçin Əmirbəyov Mehriban Əliyevanı Dünya Səhiyyə Təşkilatının yüksək mükafatına layiq görülməsi münasibətilə qonaqlar adından təbrik edib. O, Azərbaycanın birincı xanımının rəhbərlik etdiyi Heydər Əliyev Fondunun fəaliyyəti barədə də məlumat verib.

Səfir Mehriban xanımın ana, uşaq və ailə sağlamlığının qorunması, valideyn qayğısından məhrum olmuş uşaqlara qayğı göstərilməsi sahəsində xidmətlərindən danışıb. O deyib ki, Mehriban Əliyevanın rəhbərliyi ilə Heydər Əliyev Fondu səhiyyə ilə yanaşı, təhsilin, idmanın inkişafı, mədəni irsin, ekologiyanın qorunması, Azərbaycanın xaricdə təbliği sahəsində çox işlər görüb. Bütün bunlara görə Azərbaycanın birinci xanımına YUNESKO-nun və İSESKO-nun xoşməramlı səfiri adı verilib. Heydər Əliyev Fondu YUNESKO ilə birlikdə Azərbaycanda təhsilin inkişafı ilə bağlı müxtəlif layihələr həyata keçirib. Məhz Mehriban xanımın təşəbbüsü ilə mədəniyyət və incəsənətimizin bəzi nümunələri YUNESKO-nun mədəni və qeyri-maddi irs siyahılarına daxil edilib. M.Əliyeva mədəniyyətlər və dinlərarası dialoqa da öz töhfəsini verib.

Ziyafətdə ölkəmizin əsrarəngiz təbiətini, tarixi abidələrini, görməli yerlərini, dənizdəki neft mədənlərini əks etdirən sənədli film göstərilib, incəsənət ustalarımızın ifasında Azərbaycan və dünya bəstəkarlarının musiqisi səslənib.

Yeni Azərbaycan.-2007.-22 may.-S.3.