Rəsulova T.

 

Qız qalası bərpa ediləcək

 

Mədəniyyət və Turizm Nazirliyinin sektor müdiri Telman Kərimlinin dediyinə görə, təmir-bərpa işləri mərhələlərlə davam etdiriləcək

 

Mədəniyyət və Turizm Nazirliyi Bakıda və Bakı ətrafında, eləcə də regionlarda tarix və mədəniyyət abidələrində bərpa işlərini davam etdirir. Nazirliyin mədəni irs şöbəsi bərpa-layihələndirmə və ekspertiza sektorunun müdiri Telman Kərimli bərpa işləri ilə bağlı bildirdi ki, proses mərhələlərlə davam etdiriləcək: "İl ərzində Hacıqabul rayonunun Qubalı Baloğlan kəndindəki Pirhüseyn xanəgahında, Zaqatala şəhərindəki Qala divarlarında, Balakəndə Minarali məsciddə və Lənkəranda Dairəvi qalada bərpa işləri aparılıb. Eyni zamanda nazirliyin sifarişinə əsasən Quba rayonunun Rustov kənd məscidində, Astara rayonunun Ərçivan kəndindəki ləmdə bərpa işləri görülüb. Həmçinin Nardarandakı "Xan bağı"nın ətrafında drenaj sisteminin qurulması və abidə ətrafında abadlıq işlərinin həyata keçirilməsi davam edir. Yaxın vaxtlarda isə İsmayıllı rayonunun Basqal kəndindəki hamamda, Dəvəçi rayonunun Pirəbədil kəndindəki Q.Musabəyovun ev muzeyində, Qax rayonunun İlusu kəndindəki "Sumuqqala" abidəsi yaxınlığında sel sularından mühafizə işlərinə başlanacaq". Bakı şəhərində isə Qız qalasında təxirəsalınmaz bərpa-təmir işlərinin həyata keçirilməsinin nəzərdə tutulduğunu bildirən Telman müəllim onu da dedi ki, keçən ildən adları çəkilən ərazilərdə bərpa-təmir işlərinin yüksək səviyyədə tamamlanması planlaşdırılıb: "Gələcəkdə bərpa işlərinin planlı şəkildə davam etdirilməsi üçün nazirliyin sifarişinə əsasən layihə-smeta sənədləri hazırlanır. Bu məqsədlə Gəncə şəhərindəki "İmamzadə" kompleksinin, Şamaxı rayonunun Kələxana kəndindəki "Türbələr" kompleksinin, Şəki şəhərindəki şəhər kitabxanasının bərpası, Dəvəçi rayonundakı Çıraqqala abidəsinin konservasiyası, həmçinin "Şabran şəhəri" qoruğu üçün inzibati binaların tikinti layihələri başa çatdırılıb. Qobustan Dövlət Tarix Qoruğunun yeni inzibati binası üçün tikinti layihəsi üzrə işlər isə davam etdirilir. Yeri gəlmişkən, layihə sifariş verilərkən abidə ətrafında turizm infrastrukturunun inkişafı da əsas məsələlərdən biridir. Hazırda respublikamızın bütün bölgələrində təmir işlərinin yüksək səviyyədə həyata keçirilməsi üçün nazirlik tərəfindən müvafiq tədbirlər görülür. Bu məqsədlə nazirliyin mütəxəssisləri mütəmadi olaraq abidələrə texniki baxışlar keçirir və təkliflər hazırlayırlar. Salyan rayonundakı Cümə məscidində, Gədəbəy rayonunun Böyük Qaramuradlı kəndindəki Alban məbədində, Quba rayonunun Nügədi kəndindəki Minarəli məsciddə, Gəncə şəhərindəki Şah Abbas karvansarayında, Qax rayonundakı Həsənxan qalasında, Şəki şəhərindəki Aşağı karvansarada, Şəkixanovların evində və "Gələrsən, görərsən" qalasında bərpa-konservasiya işləri üzrə layihələr sifariş olunub". T.Kərimli bildirdi ki, layihələr hazır olduqları sonra müvafiq qaydada bərpa-konservasiya işlərinə başlanılacaq.

 

Yaddaş.- 2007.- 24 may.- S. 6.