"Muğamın ekranlaşdırılması"

Beynəlxalq layihə çərçivəsində ilk filmin istehsalı başa çatıb

Kinorejissorlar Gildiyasının, UNESCO və Açıq Cəmiyyət İnstitutu Yardım Fondunun təşkilatçılığı ilə "Muğamın ekranlaşdırılması" beynəlxalq layihəsi çərçivəsində ilk filmin istehsalı başa çatıb.

Bu, Pünhan Həsənlinin qısametrajlı "Süni bənövşələr" eksperimental filmidir. Bu barədə APA-ya Kinorejissorlar Gildiyasının mətbuat xidmətindən məlumat verilib. Film rejissorun muğama fərqli və qeyri-ənənəvi baxışı olaraq muğamın müasir miniatür və yeni baletlə sintezindən ibarətdir. Ekran əsəri "Film" Prodüser Mərkəzində istehsal olunub. "Muğamın ekranlaşdırılması" beynəlxalq layihəsinin II filmi Kinorejissorlar Gildiyası və Belçikanın "Michel de Wouters Productions" studiyasının birgə istehsalı olan ilk Azərbaycan-Belçika müştərək filmidir. Bu film belçikalı rejissor Kris Delvilin muğam ustası Fərqanə Qasımovanın həyat və yaradıcılığına həsr olunmuş "Düşüncələrə keçən günlər" (The meditation of the days) layihəsidir. Bu layihənin reallaşmasına Mədəniyyət və Turizm Naziriliyi də maliyyə yardımı göstərib. Hazırda film Belçikada montaj və səsləndirmə ərəfəsindədir. Layihənin rəhbəri və hər iki filmin prodüseri Hüseyn Mehdiyevdir.

Şərq.- 2007.- 17 yanvar.- S. 12.