Rüstəm Z.

Kino tarixinin yeni səhifəsi

Cari ildə bir sıra filmlər ekran həyatı qazanacaq

"Azərbaycantelefilm" Yaradıcılıq Birliyində 2007-ci ildə istehsal olunacaq filmlərin tematik planı təsdiq edilib. Birliyin direktoru Vüqar Tapdıqlının məlumatına görə, 1937-cı ildə sürgün olunmuş azərbaycanlılar haqqında "Sürgün", eləcə də "Səfəvilər", "Mif və həqiqət", "Məhəmməd Bəy Aşıq Zəngilani", "Dövlət rəmzləri" və Azərbaycan ərazisində yerləşən abidələrlə bağlı sənədli filmlər istehsal olunacaq. Bununla yanaşı, bu ilin sonuna kimi Amaliya Pənahova, Ramiz Quliyev, Səyavuş Aslan, Cabbar Qaryağdıoğlu, Ramiz Mirzəyev, Mikayıl Müşfıq, Şəfiqə Məmmədova, Rübabə Muradova və Bədəlbəylilərin həyat və yaradıcılığından bəhs edən portret filmlərin çəkilməsi nəzərdə tutulub. V.Tapdıqlının sözlərinə görə, bəzi filmlərin istehsalına yaxın günlərdə başlanılacaq.

Qeyd edək ki, ssenari müəllifı şair Ramiz Rövşən olan və Qarabağ hadisələrindən bəhs edən "Qala" bədii filmi bu il dövlət sifarişi ilə istehsal olunacaq. Mədəniyyət və Turizm Nazirliyinin Kinematoqrafiya şöbəsinin müdiri Cahangir Məmmədovun sözlərinə görə, sözügedən film Şamil Nəcəfzadənin rejissor yozumunda ərsəyə gələcək. Cəfər Cabbarlı adına "Azərbaycanfilm" Kinostudiyasında istehsal olunacaq bədii filmin aktyor heyəti hələ ki müəyyənləşməyib.

C.Məmmodov əlavə etdi ki, bu il Azərbaycan və Latviya kino mütəxəssislərinin birgə işi də nəzərdə tutulub. Onun sözlərinə görə, istehsal olunacaq filmin ssenari müəllifı Ramiz Fətəliyev olacaq, rejissor isə Latviyadan dəvət ediləcək. Bundan başqa, dövlət sifarişi ilə hazırlanacaq filmlər sırasında"Abidələr" və "Yaddaş Azərbaycan tarixi" də var. Hər iki ekran işi "Salnamə" kinostudiyasında istehsal olunacaq.

Bu il Cahangir Zeynalovun quruluşunda mərhum rejissor Gülbəniz Əzimzadənin həyat və yaradıcılığının ekranlaşdırılması planlaşdırılır. Ssenari müəllfi və rejissoru Çingiz Mustafazadə olan "Kuklalar" filmi də cari ildə çəkiləcək kino siyahısına daxil edilib. Bu il ilk dəfə olaraq Mədəniyyət və Turizm Nazirliyinin büdcəsi " hesabına gənc rejissorlar arasında müsabiqə keçirilməsi nəzərdə tutulub. C.Məmmədov bildirib ki, 5 tammetrajlı filmin qatılacağı müsabiqənin qalibi 2008-ci ildə dövlət hesabına tammetrajlı film seçmək hüququ əldə edəcək.

Yeri gəlmişkən, qeyd edək ki, kinorejissor Eldar Quliyevin rəhbərlik etdiyi "Debüt" Kinostudiyası bu günlərdə fəaliyyətini bərpa edəcək. Kinematoqrafiya şöbəsinin müdiri Cahangir Məmmədov bildirdi ki, kinostudiya dörd ildən artıqdır fəaliyyətini dayandırmışdı. Uzun fasilədən sonra kinostudiyada bu il bir neçə filmin istehsalı nəzərdə tutulub.

Ayna.- 2007.- 27 yanvar. –S. 21.