Musaqızı L.

"Bu, türkcülüyə qarşı təxribatdır"

Sənətkarlarımız Türkiyədə "Sari gəlin"in erməniləşdirilməsini belə qiymətləndirir

Ötən əsrdə əcnəbi jurnalistlərinin yazılarından birində ermənilərə dirilərindən çox ölülərinin sərf etdiyini yazmışdı. Ötən həftə Türkiyədə baş verən olay bunun həqiqət olduğunu sübut etdi. Bəlkə də Türkiyədə qətlə yetirilən erməni jurnalisti Hrant Dink sağkən ermənilərə bu qədər xeyir verməmişdi. Bizi isə bütün dünyaya səs salan bu olayın başqa tərəfi maraqlandırır. Hrant Dink olayında “Sarı gəlin” də ermənilərin "oldu". Özü də Türkiyənin hakim Ədalət və İnkişaf Partiyasının nümayəndələri onu anma mərasimində Dinkin şərəfinə "Sarı gəlin"i səsləndirdilər və Türkiyə mətbuatında dönə-dönə "Dink" erməni türküsü olan "Sarı gəlin'lə uğurlandı" dedilər. Ürək ağrıdan fakt olsa da, bunu televiziya ekranlarından hamımız müşahidə etdik. Maraqlıdır, bizmi mahnılarımıza sahib çıxa bilmirik, yoxsa ermənilər hətta Türkiyədə də o qədər güclüdürlər ki, türklərə belə "Sarı gəlin"in onların olduğunu subut etdilər.

"Sarı gəlin"in ilk orenjemançısı Faiq Sücəddinov ermənilərin bu hərəkətinə hamımızın alışqan olduğunu bildirdi: "Bu mahnı xalq mahnısıdır və 1970-ci ildə ilk orenjemanı da mən etmişəm. "Sarı gəlin" bizimdir və buna nöqtə qoymaq lazımdır".

F.Sücəddinov Türkiyədəki demokratiyanı başa düşə bilmədiyini də vurğuladı: "Mən belə demokratiyanı başa düşə bilmirəm. Necə ola bilər ki, qatili ölkəndə saxlayasan. Hrantı çoxdan ölkədən qovmalı idilər. Əgər vaxtında qovsaydılar, heç belə bir hadisə də baş verməzdi. Bəlkə də ermənilər bunu özləri ediblər, çünki belə işlərdə mahirdilər".

Türkiyədə belə bir olayın baş verməsinin arzuolunmaz olduğunu deyən bəstəkar qardaş ölkədə mahnılarımızın anonim şəkildə təqdim olunmasına da münasibət bildirdi: "Bu, düzgün deyil, axı. Müəllif Hüquqlarına görə, həmin məsələni Türkiyəyə gedib həll etmək lazımdır. Bu gün musiqilərimiz bir balaca yiyəsiz qalıb".

Musiqi Akademiyasının rektoru Siyavuş Kərimi ermənilərin nəinki mədəniyyətimizi, əsərlərimizi, mətbəximizi də oğurladıqlarını və bu günədək də fəaliyyətlərini davam etdirdiklərini dedi: "Bunun qarşısını almaq üçün özümüzü təbliğ etməliyik. Beynəlxalq aləmdə çox fəal olmalıyıq. Durub kiməsə "oxuma" deyə bilmərik. Dünyaya sübut etməliyik ki, erməni oğrudur". Muğamlarımızın mahir ifaçısı Mənsum İbrahimov "Sarı gəlin"in Türkiyədə erməni mahnısı kimi təqdim edilməsini təxribat adlandırdı: "Bu, azərbaycançılığa, türkçülüyə qarşı təxribatdır. Belə olayların qarşısını almaq üçün düzgün təbliğat aparmalıyıq. Ermənilər bir nəfərin ölümünə görə o səviyyədə hay-küy qaldırdılar, bütün dünyanın diqqətini özlərinə cəlb etdilər. Bizsə minlərlə şəhid vermişik, heç Xocalı genosidini dünyaya bu qədər təbliğ edə bilmirik. Ermənilərdən bu sahədə nümunə götürməliyik. Millətimizin haqq səsini dünyaya çatdıra, təbliğatımızı düzgün qura bilmirik. Bunu hamımız - KİV-imiz, ziyalılarımız etməlidir, harada imkan varsa, orada mübarizə aparmalıyıq, sözümüzü deməliyik".

Tarzən Ramiz Quliyev ermənilərin xalq mahnılarımızla yanaşı, bəstəkar mahnılarımızı da zaman-zaman oğurladıqlarını bildirdi: "Ancaq necə ifa etsələr də, dinləyən adam bilir ki, bu, onların mahnısı deyil. Çünki şur muğamını heç kəs şuru yaradandan yaxşı ifa edə bilməz. Milli alətlərimizi belə ermənilər özününküləşdirirlər. Bir də görürsən erməninin bir tütək çalanı, yaxud adi balabançalanı xeyriyyəçilərinin vasitəsilə dünyaya çıxır. Biz də bir-birimizi sancmaqla yox, bir-birimizə əl verib arxa olmaqla irəli gedə, musiqilərimizə sahib çıxa bilərik. Onda heç kəs cürət edib musiqilərimizi oğurlaya bilməz. "Sarı gəlin" şur muğamıdır. Ermənilərdə isə muğam yoxdur".

Türklərin “Sarı gəlin”i erməni musiqisi kimi təqdim etməsinə gəlincə, Ramiz Quliyev hesab edir ki, kimisə son mənzilə yola salanda adamın gözünün qarşısına bir Allah gəlir, bir də qarşıda gedən ruh: "Sarı gəlin" də Allahla ruh arasında körpü, vasitədir. Bu o qədər ürəyəyatımlı bir mahnıdır ki, hüzn yerlərində oxuyurlar. Ayılanda isə görürlər ki, kimin üstündə, kimin musiqisini oxuyublar. Belə başa düşürəm ki, Türkiyədə ermənilərin Azərbaycandan oğurladıqları "Sarı gəlin"i deyil, Azərbaycan "San gəlini"ni oxuyublar".

Üç nöqtə.- 2007.- 26 yanvar.- S. 8.