Salmanov R.

Əməkdar kollektivin yubileyi

F.Əmirov adına əməkdar kollektiv, Dövlət Mahnı və Rəqs Ansamblının 70 yaşı tamam olur. Bu münasibətlə yanvarın 23-də M.Maqomayev adına Azərbaycan Dövlət Filarmoniyasında böyük yubiley tədbiri keçirildi. Təməli dahi bəstəkarımız Üzeyir Hacıbəyov tərəfındən qoyulmuş bu kollektivdə adı xalqımız tərəfındən iftixarla çəkilən bir çox sənət xadimləri, rəqqas və aktyorlar çıxış etmişlər. Elə bu səbəbdən də gecəyə dəvətli qonaqlar sırasında Azərbaycan mədəniyyəti və incəsənətini bütün dünyada tanıdan korifey nümayəndələr üstünlük təşkil edirdi.

Gecəni giriş sözü ilə açan Azərbaycan Respublikası Mədəniyyət və Turizm Naziri Əbülfəs Qarayev əməkdar kollektivi təbrik edərək ansamblın keçdiyi zəngin və çoxşaxəli yaradıcılıq yolundan söz açdı. Vaxtilə bu kollektivə rəhbərlik etmiş B.Salahov, S.Rüstəmov,

H.Xanməmmədov, C.Cahangirov, A.Qafarov, V.Adıgözəlov, T.Hacıyev, R.Mirişli, Q.Qəribovun, eləcə də bu gün kollektivə rəhbərlik edən professor Ağaverdi Paşayevin əməyini yüksək dəyərləndirdi.

Azərbaycanın bir çox tanınmış, sevilən artistlərindən bu kollektivin yetirməsi olmuş Nəsibə Zeynalova, Sara Qədimova, Leyla Bədirbəyli, Məlik Dadaşov, rəqqasə Əminə Dilbazi və bir çoxlarının Azərbaycan mədəniyyəti və incəsənətinin təbliği sahəsində çox böyük əməkləri olduğunu qeyd etdi.

Çıxışının sonunda Əbülfəs Qarayev yubiley gecəsinin daha bir əlamətdar günə - respublikanın xalq artisti, rəqqas Böyükağa Məmmədovun anadan olmasının 80 illiyinə təsadüf etdiyini bildirdi və veteran rəqqası səhnəyə dəvət etdi.

Nazir mahnı və rəqs kollektivi, eləcə də tamaşaçılar tərəfindən sürəkli alqışlarla qarşılanan Böyükağa Məmmədovu təbrik edərək nazirliyin fəxri fərmanını və tər çiçək dəstəsini yubilyara təqdim etdi.

Xalq artisti, Azərbaycan Milli Konservatoriyasının rektoru, professor Səyavuş Kəriminin çıxışını da tamaşaçılar sürəkli alqışlarla qarşıladılar. Bu gün Azərbaycan incəsənətinə dövlət başçısı tərəfindən göstərilən diqqət və qayğıya çox böyük önəm verən natiq öz çıxışında dünyasını dəyişmiş ilk əməkdar artist adını almış rəqqasə Tutu Həmidovanın, Qorxmaz Qurbanov, Əlikram Aslanov, Ramiz Eynullayev və digərlərinin adlarını çəkməklə dünyanın bir çox ölkələrində olmuş kollektivin yaradıcılıq nailiyyətlərindən, bəstəkarların məxsusi bu kollektiv üçün yazdıqları əsərlərdən söz açdı. Yubilyarı təbrik edənlər sırasında Akademik Opera və Balet Teatrının, Uşaq Filarmoniyasının, Akademik Milli Dram Teatrının kollektivi adından xalq artistləri Yaşar Nuri, Telman Adıgözəlov və digərləri vardı.

F.Əmirovun "Min bir gecə" baletindən fraqment, ansamblın solistləri Zakir Əliyevin oxuduğu xalq mahnısı "Sevirəm səni", Rəna İbrahimovanın "Vağzalı - Mirzəyi" rəqsi, Almaz Orucovanın oxuduğu "İnnabı" mahnısı, xalq artisti Cəmilə Bayramova və əməkdar artisi Xanlar Bəşirovun ifasında H.Xanməmmədovun "Xəyal" rəqsi, eləcə də ansamblın solisti Zülfıyyə İbrahimovanın ifasında Telman Hacıyevin "Vətən" suitası və digər musiqi nömrələri tamaşaçılar tərəfmdən rəğbətlə qarşılandı.

Nüsrət Fətəliyev - ansamblın keçmiş solisti:

- 1963-cü ildən 80-ci ilə qədər bu kollektivdə çalışmışam. Dünyanın bir çox ölkələrində qastrol səfərlərində olmuşam.

Hər yerdə hörmət və ehtıramla qarşılanan bu kollektiv, çox şadam ki, bu gün də öz simasını saxlaya bilib. Bu gün veteran rəqqasların, musiqi kollektivi üzvlərinin çoxu yubiley tədbirinə dəvət olunub. İllərdən bəri görmədiyim sənət dostlarını bu gün burada görüb sevinirəm. Yaşa dolsalar da, çoxu cavan görünürdü. Kollektivin yubileyi həm də bizim yubileyimizdir. Dəvətə görə öz dərin təşəkkürümü bildirirəm.

Elxan Səmədzadə - keçmiş solist, musiqiçi:

- 1964-cü ildə Asəf Zeynallı adına Musiqi Məktəbində oxuyarkən bu kollektivə dəvət olunmuşam. Kollektivin daim qastrol səfərlərində olduğunu bilən məktəb rəhbərliyi mənim kollektivdə çalışmağıma icazə verməsə də, Əhməd Bakıxanov və Cahangir Cahangirovun zəmanəti ilə istisna olaraq məni musiqi kollektivinə balaban çalmağa işə götürdülər. Bir xeyli bu kollektivdə çalışdım. Sağ olsunlar ki, bu şad gündə məni yaddan çıxarmayıblar

Xalq qəzeti.- 2007.- 26 yanvar.- S. 7.