«Sazı mənimlə basdırmağı vəsiyyət etmişəm»

«Azərbaycandayam, bir yerə getməmişəm. Yeddi ildir Bakıda yaşayıram. Amma son dövrlər məclislərə az-az gedirəm. Səhhətim də arabir dəyişir. Gah yaxşı olur, gah pis».

Bunu APA-ya eksklüziv müsahibəsində tanınmış sənətkar aşıq Ədalət Nəsibov deyib. İndiyədək ona nədən fəxri ad verilməməsi ilə bağlı sualı cavablandıran aşıq bunları deyib:

- Mənə xalq artisti adı vermək üçün təqdimat yazmaq istədilər, amma razılaşmadım. Mən artist deyiləm, el aşığıyam. Mənə xalq aşığı adı verilməsini istəyirəm. Deyirlər, gərək bununla bağlı, Milli Məclis qərar çıxarsın. İstəyirəm Azərbaycanın ilk xalq aşığı fəxri adına mən layiq görülüm.

- Sizdən sonra sazınızı kim çalacaq?

- Bir dəfə jurnalist Firudin Şuşinski yazmışdı: “Məndən olsa, Ədalətdən sonra sazı məhv edərəm”. Övladlarıma sazı mənimlə basdırmağı vəsiyyət etmişəm. Bu məsələ ilə bağlı mənə çox təkid eləyiblər. Özümlə basdıracağım saz evdədir. Onun üzünü sökdürmüşəm. Sazın üzünün ürəyimin üstünə qoyulmasını vəsiyyət etmişəm. Saz mənimlə getməlidir. Artıq 10 ildir ki, bu barədə qəti qərar vermişəm, övladlarım da bilir. Özümlə bu dünyadan pul-var aparmıram, bircə sazımı istəyirəm. Vaxt vardı ki, sazı 5-10 manata alan yox idi, amma indi sazın qiyməti 500 dollar olub. Bunu Ədalət eləyib. Məndən sonra nə olacaq, bilmirəm. Çalmağına çalacaqlar, ancaq Ədalət olmayacaq.

Gündəlik Azərbaycan.-2007.-30 yanvar.-S.13.