Nəzakət

"Pəri Cadu" tamaşası ilk səhnə həyatını yaşadı

Dövlət sifarişilə hazırlanan tamasa anşlaqla keçdi

Özünün səhnə və oxucu həqiqətini tapmış klassik dramatik əsarlərə həm aktyorlar, həm də rejissorlar arasmda böyük meyil var. Çünki klassikanı dərk etmək, səhnə təcəssümünü vermək inkişaf deməkdir. Bunu nəzərə alan Azərbaycan Mədəniyyət və Turizm Nazirliyinin rəhbərliyi klassik dramaturqlarımızdan olan Əbdürrəhimbəy Haqverdiyevin "Pəri Cadu" tamaşasının Gənc Tamaşaçılar Teatrında Dövlət sifarişi ilə hazırlanması üçün sərəncam vermişdi.

Sərəncama əsasən, hazırlanan "Pəri Cadu" tamaşanın bazar günü Akademik Milli Dram Teatrın səhnəsində premyerası çox böyuk uğurla keçdi. Bildiyimiz kimi, Gənc Tamaşaçılar Teatrı, eləcə də digər sənət məbədləri ölkə Prezidentinin sərəncamına əsasən, bərpa işlərilə əlaqədar müvəqqəti olaraq bağlandığından, teatrın yaradıcı kollektivi repertuarlarına daxil etdikləri yeni tamaşanı, məhz Akademik Milli Dram Teatrın səhnəsində tamaşaçılara təqdim etdilər.

Premyerada Mədəniyyət və Turizm Nazirliyi incəsənət şöbəsinin müdiri, əməkdar incəsənət xadimi Əliqismət Lalayev, teatr sektorunun müdiri Naidə xanım İsmayılzadə, tanınmış teatrşünaslar və ictimaiyyətin nümayəndələri iştirak edirdilər.

Mistika və simvolizənin sintezində səhnə təcəssümünü tapan sənət əsərində Xeyirin Şər qüvvələr üzərində əbədi qələbəsi rejissor yozumunda əks olunmuşdur. "Pəri Cadu"nun tamaşaçıya ötürdüyü gözəl insani hisslər çoxdur: məkr və hiylənin insan ağlı qarşısında dəyərsizliyi!

Dinamik gerçəklikdə həllini tapan tamaşada tryuklar, mürəkkəb fiziki elementlər, musiqi, bir sözlə, bədii ifadə vasitələrinin çoxluğu onun daha asan qavramlmasına kömək edir.

Qeyd edim ki, tamaşanın quruluşçu rejissoru və plastik həlli Nicat Kazımovundur. Quruluşçu rəssamı Lətifə Quluzadə, musiqi tərtibatı İradə Muradova, rejissor assistenti Manaf Dadaşov, tryukların quruluşu İsa Əsədovundur. "Pəri Cadu"nun səhnə reallığını aktyorlardan Naibə Allahverdiyeva, Rahib Əliyev, Elşən Rüstəmov, Kəmalə Hüseynova, Sevinc və Vüsal Mehrəliyevlər, Rasim Cəfərov, Ceyhun Məmmədov, Elşən Şıxəliyev, Eyvaz İbrahimov, Sonaxanım Əliyeva, Püstəxanım Zeynalova, İlham Əsədov, Güşvər Şərifova, Təhminə Məmmədova, Təzəgül Məmmədova, Firuzə Balayeva, Aybəniz Əhmədova, Yaqut Bədəlova yaşayırlar.

Səs.- 2007.- 30 yanvar.- S. 12.