Hacıbaba Bağırovun oynadığı tamaşalar repertuardan yığışdırıldı

E.Ocaqov: "Başqa bir aktyorun həmin rolların öhdəsindən gəlməsi hələlik çox çətindir"

Azərbaycan Dövlət Musiqili Komediya Teatrında bir sıra islahatlar həyata keçiriləcək. Bunu teatra yeni təyin olunmuş direktor, əməkdar mədəniyyət işçisi Elxan Ocaqov söylədi. Uzun illər sənət ocağında sərəncamçı direktor işləyən və kollektivə yaxından bələd olan E.Ocaqov mərhum sənətkar Hacıbaba Bağırovdan sonra Musiqili Komediya Teatrına rəhbərlik etməyin çətin olduğunu bildirdi. Onu da qeyd etdi ki, H.Bağırov özü ona bu səlahiyyətləri həyata keçirmək üçün imkan yaradıb.
"Keçid dövrü bütün sahələrdə olduğu kimi teatra da böyük təsirini göstərib. Teatrlar tamaşaçılarını, repertuarını, formasını, korifeylərini itirib. Bunun səbəbini dramaturq, rejissor, istedadlı aktyorların çatışmazlığında axtaran E.Ocaqov söylədi ki, rəhbərlik etdiyi teatra tamaşaçıların cəlb olunması üçün repertuarda xeyli dəyişiklik ediləcək: "İndiki gənclər dünyadakı müasir inkişaf axınına qoşulur və hər şeydən xəbərdardırlar. Ona görə də tamaşaçıları 20-30 il bundan qabakı repertuarla buraya cəlb edə bilmərik. Teatrın işi, yaradıcılıq ab-havası günün tələblərinə cavab verməlidir".
"Teatr haqqında" qanun layihəsinin hazırlanmasını teatrların inkişafı üçün çox mühüm addım hesab edən Elxan Ocaqov deyir ki, əgər teatr fəaliyyətini geniş kütləyə çatdıra bilmirsə, onun işi öz mahiyyətini itirmiş olur, dövlətin qanunları belə onun dirçəlməsinə zəmin yarada bilmir, bunun üçün reklama, real işə əsaslanan təbliğata geniş yer verilməlidir. Biz adətən küçələrə afişa yapışdırmaqla işimizi bitmiş hesab edirik. Amma bu günün tamaşaçısını afişalarla teatra cəlb etmək bir az köhnəlmiş üsuldur. Yeni təbliğat maşınları işləməlidir. Bu barədə Muskomediyanın yeni planları hazırlanır. Eyni zamanda biletlərin qiyməti kommersiya maraqları üzərində qurula bilməz. Bütün təbəqələri nəzərə alaraq orta qiymət həddindən çıxış etməliyik".
Yeni teatr rəhbəri reklam vasitəsi kimi internetdən də istifadə edəcəklərini bildirdi. O, yaxın günlərdə tamaşaçıların internet vasitəsi ilə teatrdan bilet sifariş etmək imkanı qazanacaqlarını söylədi. Hazırda teatrın hazır materialları sayta yerləşdirilir. Qeyd edək ki, saytda teatrın tarixi, korifey sənətkarları və tamaşaçıları haqqında məlumatlar yerləşdirilir. Eyni zamanda həftəlik və aylıq afişalar da sayta daxil ediləcək. Direktor onu da bildirdi ki, aktyorların əmək haqları aşağı olduğundan gənc kadrlar teatrlardan uzaqlaşırlar.
"Bir çox istedadlı gənclərimiz əmək haqqının azlığı üzündən teatrdan qaçır və kommersiya sturukturlarında fəaliyyətə meyl göstərirlər. Onları teatra yönəltmək üçün yaxşı şərait və yüksək məvacib şərtdir. Yəqin ki, dövlət məmurları bu məsələnin tezliklə çözülməsinə səy göstərəcəklər".
Yaxın ayların birində teatr binasının əsaslı təmir olunacağından xəbər verən E.Ocaqov səs avadanlıqlarının yeniləri ilə əvəzlənməsinin vacibliyini qeyd etdi. Teatra peşəkar xarici və yerli aktyorların cəlb olunmasını gələcək üçün istisna etməyən Elxan Ocaqov bunun islahatların yeni mərhələsi üçün nəzərdə tutulduğunu dedi.
"Vaxtilə teatrdan bir çox aktyorlar müəyyən səbəblərdən küsüb getmişdilər. Onlardan Xanlar Muradov, Atabala Səfərov, Ağarəfi Rəhimov, Fuad Əhmədov, Novruz Əliyev, Afaq Bəşirqızı və Ələkbər Əliyevi teatra qaytardıq. Bu yaxınlarda İlham Namiq Kamal teatrımızda ştat əsasında işə başlayıb. Muskomediyada əsas obrazları ifa edən vokalçıların qıtlığı yaranmışdı. Bu günlərdə bir neçə vokal imkanı olan gəncləri teatra cəlb etmişik".
Teatr rəhbəri bildirdi ki, bu ilin mayında İsrail Dövlət Dram Teatrı Azərbaycana səfər edəcək. Bu günlərdə isə Moskva və Sankt-Peterburqun operetta teatrları ilə danışıqlara başlanılacaq. Onların klassik tamaşalarının qəhrəmanlarının Muskomediyada silsilə çıxışları olacaq. E.Ocaqov köhnə tamaşalardan birini də tezliklə teatrın repertuarına gətirməyi düşünür: "Neçə illər öncə Bəşir Səfəroğlunun baş rolu ifa etdiyi "Milyonçunun dilənçi oğlu" tamaşası artıq yaddaşlardan silinməkdədir və bu tamaşa hətta televiziyanın fondunda da tam formada yoxdur. Bu səbəbdən həmin əsəri gənc rejissorlardan birinin quruluşunda yeni variantda təqdim etmək nəzərdə tutulub".
Yeni direktor onu da qeyd etdi ki, Hacıbaba Bağırovun baş rolları ifa etdiyi tamaşalar teatrın repertuarından çıxarılacaq. Onun fikrincə, başqa bir aktyorun həmin rolların öhdəsindən gəlməsi hələlik çox çətindir.

Ayna.-2007.-31 yanvar.-S.8.