Bakıda Misir filmləri festivalının açılışı oldu

Yanvarın 28-nə kimi davam edəcək festivalda efir üzü görməyən filmlər nümayiş etdiriləcək

Dünən Misir Ərəb Resbulikasının Bakıdakı Mədəniyyət Mərkəzində Misir filmləri həftəsinin açılış mərasimi keçirilib. Qurumun direktoru İmam Bağdadi filmlərin yanvarın 28-nə kimi nümayiş olunacağını deyib: "Azərbaycanda belə bir tədbirin həyata keçirmək bizim üçün olduqca şərəflidir. Azərbaycan tamaşaçılarını Misir kinosu ilə yaxından tanış etmək çox yaxşı layihədir. Həftə ərzində azərbaycanlı tamaşaçılara Misirin yeni və bu zamana kimi göstərilməmiş filmləri nümayiş etdiriləcək. Nümayiş Misir Mədəniyyət Mərkəzində baş tutacaq. Filmlərin nümayişi zamanı Misir kinosunun tarixi haqqında məlumat verilməsini də nəzərdə tutmuşuq". Tədbirdə çıxış edən Misir Ərəb Respublikasının ölkəmizdəki səfiri Yusif əl-Şarkavi bu cür tədbirlərin keçirilməsini çox yaxşı hal kimi qiymətləndirib. Səfir bu il belə bir layihənin Misirdə təşkil olunacağını və bir həftə ərzində Azərbaycan filmlərinin nümayiş olunacağını diqqətə çatdırıb. Misir filmləri həftəsinin ilk günü rejissor İsmayıl Yasinin "Uçuşda" və "Tutu Həmadənin dəstəsi" filmi nümayiş etdirilib. Həftə ərzində Misir rejissorlarının çəkdiyi "Orduda", "Hənifənin gözəli", "Sehrli lampa", "Həbsxanada məhəbbət", "Gizli polis", "Ramazan vulkan üstündə", "Yasmin" filmləri göstəriləcək. Filmlərin nümayişi zamanı sərgidə təşkil olunub.

Yeni Azərbaycan.- 2007.- 23 yanvar.- S. 8.