Kinorejissor Eldar Quliyev böyük kitabxanası ilə fəxr edir

Xalq artisti Siyavuş Aslan isə “Hellas”ı oxuyur...

Məmləkətimizin çox istedadlı, şöhrəti aşıb-daşan sənətçiləri çoxdur. Zaman-zaman onlarla bağlı hər şeyi öyrənməyə çalışdıq. Bu dəfə isə sanətçilərimizin mütaliəsi ilə maraqlandıq. İstədik öyrənək görək, daima tamaşaçıların əhatəsində olan sənətçilərimiz kitab oxumağa necə vaxt tapırlar? Çünki bir zamanlar kitab oxumaq dəbdə idi. Hətta o dövrdə insanlar şəxsi kitabxana yaratmaq uğrunda bir-biri ilə bəhsə də girirdilər. Kimisi mütaliə etdiyi üçün, kimisi də elə belə dəb xatirinə kitab alıb evə yığırdı. O səbəbdən sənətçilərimizə "mütaliə edlrsinizmi?" sualı ilə üz tutduq. Olduqca təmtəraqlı cavablarla qarşılaşdıq...

Xaiq artisti Siyavuş Aslan sualımızı eşidib güldü. Cavabı isə qısa və konkret oldu: "Hə, "Hellas" oxuyuram. Yaşım az qala 75-ə çatır, kitab oxuyan vaxtımdır?"

Bildiyimizə görə, Siyavuş müəllim həm də hacıdır, yəni dindardır və yəqin ki, o Məhəmməd peyğəmbəri dediyi "Qəbir evinəcən oxumaq lazımdır" sözlərini bilməmiş deyil...

Müğənni Elxan Şirinov həm də pedaqoq kimi Dövlət Dillər Universitetində çalışdığını önə çəkib mütəmadi olaraq mütaliə etdiyini söylədi: "Mən həmişə qiraətlə məşğul oluram. Mən elə adamam ki, bir kitabı bir neçə dəfə oxuyuram. Ola bilər ki, tələbə vaxtı Teodor Drayzerin "Dahi" romanını oxumuşam, bir daha yenidən oxuyuram. Yəni tələbə vaxtı ingilis variantını oxuduğum əsərlərin indi azərbaycancasını oxuyuram. Tolstoyu indi orta məktəb və tələbə dövrlərində olduğundan təmamilə fərqli bir düşüncə ilə oxuyuram. Görürəm ki, o vaxt tamamilə fərqli başa düşmüşəm. Axırıncı ayda Tolstoyu, Drayzeri, Hemenqueyi, ingilis dili ilə bağlı kitablarını oxumuşam. Mən əsərləri janrlarına görə seçmirəm. Qeyd edim ki, tarixi əsərlərə o qədər də həssas yanaşmıram. Bəlkə bu da mənim kobud desəm, tarixdən savadımın azlığından irəli gəlr. Bir tərəfdən də tarixi kitabların hardasa inandırıcı olmasına şübhə ilə baxıram. Çünki hər bir fakt sübut tələb edir. Məni əsasən məntiqli əsərlər cəlb edir. Poeziya isə öz yerində, həmişə şeir oxuyuram." Sənətçinin sonuncu oxuduğunuz kitab hansı olub sualına cavabı isə belə oldu: Ernest Hemenqueyin "Əcəl zəngi". Vaxtilə ingilis dilində oxumuşdum, indi Azərbaycan variantını oxuyuram.

Xalq artisti Fuad Poladov əsasən dram əsərləri oxuduğunu söylədi: "Mən çalışıram yeni dram əsəri çap olunanda onu tapıb oxuyum. Başqa vaxt isə dünya ədəbiyyatından əlimə yeni kitab düşəndə oxuyuram. Məxsusi rəğbət bəslədiyim əsər yoxdur. Yaxşı şeirlərə həvəs göstərirəm, amma əsasən nəsr əsərlərinə üstünlük verirəm. Axırıncı dəfə Paulo Kolyanın "Alximik" əsərini oxumuşam."

Xalq artisti Qədir Rüstəmov sən demə, gününü kitab oxumaqla keçirirmiş. "Ədəbiyyatı bəlkə də mənim qədər oxumamısınız. Birdən elə olur, həftələrlə kitab oxuyuram, axırda başım ağrıyır... Özümüzünkülərdən, Nizamidən tutmuş üzü belə hamısının kitablarını oxumuşam. Hələ xariciləri demirəm. Amma bu Qarabağ məsələsi ortalığa çıxandan bəri kitab yaddan çıxıb. Amma bir məsələ var ki, oxumuş adamla mən bir deyiləm, a. Anlayışım var. Lakin anlayış ayrı şeydir, bilmək ayrı".

Mütaliənin sevimli işlərindən biri olduğunu deyən, Xalq artisti kinorejissor Eldar Quliyev böyük bir kitabxanası olması ilə fəxr etdiyini söylədi: "Kitab oxuyuram, özü də mənim şəxsi kitabxanamın olması ilə fəxr edirəm ki, orda 4-5 min kitab var. Elə bilirəm, böyük varidatım var. Özü də deyim ki, bu xüsusiyyət bəlkə də mənə atamdan keçib. Tofiq Ələkbəroviçin böyük kitabxanası vardı." "Bəs o kitabxana kimdədir" sualını isə kinorejissor belə cavablandırdı: "Öz evindədir, amma son illərdə həmin kitablardan mənə bağışlayırdı. Həm bağışlayırdı, həm də elələri vardı özüm bir bəhanə ilə ondan alırdım. Bəzilərini isə, bağışlamağa məcbur edirdim. Onun bundan başqa çox gözəl not kitabları da vardı. Elə vaxt olurdu ki, mənə zəng edib deyirdi, filan kitab mağazasında yaxşı kitab var, get onlara bax".

Qeyd edək ki, Eldar müəllim şeirdən başqa bütün janrları xoşlayır: "Mən detektivi də sevirəm, klassik əsərləri də. Poeziya ilə təəssüf ki, aram yoxdur. Bu məsələdə mən bir acizəm. Şairləri tanıyıram, əsərlərini də oxumuşam. Amma bu məsələdə yenə deyirəm, özümü peşəkar saymıram.

Söhbətimizin sonunda rejissor hazırda Moldaşovun əsərlərini oxuduğunu qeyd etdi: "Hazırda Moldaşovun kitablarını oxuyuram. Özü həkimdir, amma Tibetə, Pamirə etdiyi səyahətlərlə bağlı kitabları çox maraqlıdır. Doğrudur, bəzi məsələlərlə onunla razı deyiləm, amma maraqlı faktlar da var. Sonra Markizin "100 il tənha" əsərini hesab edərdim, son yüzilliyin ən zirvədə duran kitabıdır. O vaxtilə bu kitaba görə, Nobel mükafatına layiq görüldü."

Üç nöqtə.- 2007.- 12 yanvar.- S. 13.