Görkəmli şəxsiyyətlərimizin

Tbilisidəki ev-muzeyləri Azərbaycan

hökumətinə bağışlanacaq

Ölkəmizin Gürcüstandakı səfirliyinin səyləri sayəsində Azərbaycanın görkəmli şəxsiyyətləri Mirzə Fətəli Axundovun, Cəlil Məmmədquluzadənin və Nəriman Nərimanovun Tbilisidəki ev-muzeyləri Gürcüstanın dövlət reyestrinə salınmışdır. Onlardan biri M.F.Axundovun ev-muzeyi Azərbaycan Prezidenti İlham Əliyevin göstərişi ilə əsaslı təmir olunmuş və yenidən fəaliyyətə başlamışdır.

Səfir Namiq Əliyev bildirmişdir ki, bundan sonra hər üç muzeyin əməkdaşları maaşlarını Gürcüstanın Mədəniyyət və İdman Nazirliyindən alacaqlar.

Xatırladaq ki, M.F.Axundovun ev-muzeyindəki dəyərli eksponatlar və bütün əmlak Ümummilli liderimiz Prezident Heydər Əliyevin tapşırığı ilə hələ 1996-cı ildə alınmış, orada eyni zamanda mədəniyyət mərkəzi yaradılmışdır. Sonralar bu muzeyin yerləşdiyi otaqlar, habelə N.Nərimanovun, C.Məmmədquluzadənin vaxtilə yaşadıqları mənzillər şəxsi mülk kimi soydaşlarımız tərəfindən satın alınmışdır. Sonuncu iki mənzil də əsaslı təmir edilmiş, lazımi eksponatlarla, o cümlədən yeni əşyalarla təmin olunaraq ev-muzeylərinə çevrilmişdir.

Həmin ev-muzeylər yaxın vaxtlarda Azərbaycan hökumətinə bağışlanacaqdır.

Azərbaycan.- 2007.- 14 yanvar.- S. 3.