Litvada yaşayan azərbaycanlı rəssamın sərgisi açılıb

Müasir İncəsənət Mərkəzində Litvanın Azərbaycandakı səfirliyi və Azərbaycan Rəssamlar İttifaqının birgə təşkilatçılığı ilə Litvada yaşayan azərbaycanlı rəssam Adilə Əfəndiyevanın fərdi sərgisinin açılış mərasimi keçirilib. Sərgidə çıxış edən Litvanın Azərbaycandakı səfiri Kestutis Kudmanas rəssamın yaradıcılığını olduqca yüksək qiymətləndirib. Azərbaycan Rəssamlar İttifaqının sədri, Xalqrəssamı Fərhad Xəlilov sərgidə 24 tablonun nümayiş etdirildiyini deyib: "Belə bir rəssamın Azərbaycan vətəndaşı olması olduqca böyük fəxrdir. Adilə xanım 26 ilə yaxındır ki, Litvada yaşayır. Bu illər ərzində o, sənəti ilə Azərbaycan incəsənətini tanıtmağa çalışır".

Açılış mərasimində çıxış edən Adilə Əfəndiyeva 10 günə yaxındır Bakıda olduğunu vurğulayıb: "Bakı bu illər ərzində inanılmaz dərəcədə dəyişilib. Bundan sonra tez-tez sərgilərimi təşkil etməyi düşünürəm". Noyabrın 12-də Litvaya qayıdacağını deyən rəssam sərginin ayın 7-nə kimi davam edəcəyini qeyd edib.

Kaspi.- 2007.- 3-5 noyabr.- S. 17.