Lətif Kərimov adına Azərbaycan Xalçaçılıq Fondu yaradılıb

Bakıda Lətif Kərimov adına Azərbaycan Xalçaçılıq Fondu yaradılıb. Bunu APA-ya açıqlamasında Azərbaycan Rəssamlar İttifaqının katibi, fondun vitse-prezidenti Ənvər Qarayev deyib. Fondun Azərbaycan Mədəniyyətinin Dostları Fondunun təşəbbüsü ilə yaradıldığını bildirən S.Qarayev onun binasının Badamdarda yerləşdiyini vurğulayıb: "Hazırda fondda yeni xalçalardan ibarət ekspozisiya hazırlanır. Fondun yaradılmasında əsas məqsəd Azərbaycan xalçaçılıq sənətini dünyada tanıtdırmaq və Azərbaycanın daxilində xalçaçılıq sənətinin inkişaf etdirilməsidir. Hər birimizə məlumdur ki, Azərbaycan xalçaları dünyada bəzən İran, erməni xalçası kimi təqdim olunur. Fondun fəaliyyəti bu cür söz-söhbətlərə son qoyacaq. Artıq bütün dünya ictimaiyyəti xalçaçılıq sənətinin ən qədim nümunələrinin bizə məxsus olduğunun sahidi olacaq". O.Qarayev deyib ki, fondda Lətif Kərimovun kataloqu hazırlanacaq. Fondun təqdimatının dekabrda kecirilməsi nəzərdə tutulub.

Palitra.- 2007.- 21 noyabr.- S. 15.