Sloveniyanın
Nova Qoritsa şəhəri yaxınlığındakı
Şempas qəsəbəsində Azərbaycanın igid
oğlu, Sovet İttifaqı Qəhrəmanı Mehdi
Hüseynzadənin - əfsanəvi Mixaylonun abidəsinin
təntənəli açılış mərasimi ilə
bağlı fotoşəkillər bu ölkənin
müxtəlif qəzetlərində dərc olunmuşdur.
Müəllif, Sloveniyanın tanınmış fotojurnalisti,
operator, rəssam, tərcüməçi xanım Vesna
Krinivets həmin fotoların bir neçəsini AzərTAc-a
göndərmişdir. O yazır ki, abidənin
açılması, mətbuatın bu hadisəyə
münasibəti Azərbaycanın igid oğlunun, İkinci
Dünya müharibəsi illərində Sloveniyada
müqavimət hərəkatı qəhrəmanının
sloveniyalılar tərəfindən
unudulmadığını, daim xatırlandığını
göstərən nümunədir.
Xatırladaq ki, bu il oktyabrın 25-də keçirilmiş
tədbirdə Azərbaycan Respublikası Baş nazirinin
müavini Elçin Əfəndiyevin rəhbərlik etdiyi
geniş tərkibli nümayəndə heyəti,
ölkəmizin Avstriyadakı səfirliyinin
əməkdaşları, Sloveniya Xarici İşlər
Nazirliyinin, Nova Qoritsa şəhər rəhbərləri,
M.Hüseynzadə ilə çiyin-çiyinə
vuruşmuş silahdaşları və yerli sakinlər
iştirak etmişdir.
Xalq qəzeti.- 2007.- 6 noyabr.- S. 4.