Ağazadə E.
Musiqi sənətinin
yorulmaz təbliğatçısı
Bu il Azərbaycanın
bir sıra ziyalılarının yubiley mərasimləri keçirilməkdə
davam edir. H.Cavid, C.Rumi, Seyid Hüseyn kimi görkəmli incəsənət
xadimləri arasında dahi bəstəkar, dirijor,
dünyaşöhrətli müsiqiçi maestro Niyazinin
də adı var. Parlaq ifaçılıq və
bəstəkarlıq istedadına malik olan bənzərsiz
sənətkar maestro Niyazi öz yaradıcılıq yolunda
bəstəkarlıq və ifaçılıq sənətini
yüksək zirvələrə qaldırmışdır.
Əksər bəstəkarların əsərləri ilk
dəfə olaraq məhz Niyazinin ifasında
səsləndirilmiş və sevilmişdir. Onların
içərisində M.Maqomayevin "Nərgiz" operası,
Q.Qarayev və C.Hacıyevin birlikdə yazdığı
"Vətən" operası, "İldırımlı
yollarla" və "Yeddi gözəl" baletləri,
F.Əmirovun "Şur" və "Kürd
ovşan"simfonik muğamları, "Sevil" operası,
A.Məlikovun "Məhəbbət əfsanəsi" baleti
və. eləcə də rus və Avropa
bəstəkarlarının əsərləri Niyazinin dirijorluğu
ilə ifa olunmuşdur. Məşhur Hacıbəyovlar
nəslinin nümayəndəsi olan maestro Niyazinin belə bir
istedada malik olması heç də təsadüfi deyil,
çünki bu nəsil Azərbaycanın musiqi
mədəniyyətinə çox böyük
töhfələr vermişdir.
Qeyd etmək
lazımdır ki, dahi dirijor olmasına baxmayaraq Niyazi
sənətə ilk dəfə bəstəkar kimi
gəlmişdir. Onun əsərlərində Azərbaycan
xalqının musiqi sənəti özünəməxsus
şəkildə verilir. Burada biz həm xalq mahnılarına,
rəqs havalarına, həm də aşıq musiqisinə rast
gələ bilərik. "Təbrizim", "Vətən
haqqında mahnı", "Arzu" və s. kimi mahnılar
bu gün də sevilərək dinlənilir.
Bu il dahi maestronun 95 illik
yubileyidir. Bu məqsədlə Üzeyir Hacıbəyovun ev
muzeyində dünyaşöhrətli musiqiçi maestro
Niyazinin 95 illiyinə həsr olunmuş elmi-praktik konfrşns
keçirildi. Konfransın əsas məqsədi vaxtilə
Niyazini yaxından
tanımış,
onunla birlikdə çalışmış insanları
bir yerə toplayaraq dahi dirijor və görkəmli
bəstəkar maestro Niyazinin xatirəsini yad
etmək idi. Azərbaycan Bəstəkarlar İttifaqının İdarə Heyətinin sədri, xalq
artisti, professor Firəngiz Əlizadə
konfransı giriş sözü ilə açaraq maestro
Niyazinin Azərbaycan musiqisindəki rolundan və musiqimizin
inkişafına dair gördüyü işlərdən
danışdı. Maestro ilə ailəvi dost olmuş
BMA-nın rektoru, SSRI və Azərbaycan Respub-likasının
xalq artisti, professor Fərhad Bədəlbəyli və xalq
artisti, professor Xuraman Qasımova Niyazi haqqında xatirələri
ilə çıxış edərək özlərinin
professional musiqiçi kimi
formalaşmalarında
Niyazinin rolunu xüsusi
qeyd etdilər. Xuraman Qasımova və eləcə də
Fərhad Bədəlbəyli Niyazi haqqında maraqlı
xatirələri ilə çıxış edərək
maestronun nəinki dahi musiqiçi,
həm də daxilən çox gözəl və
geniş dünyagörüşünə malik bir insan
olduğunu qeyd etdilər. Daha sonra Mədəniyyət və
Turizm Nazirliyi tərəfindən
çıxış
edən Fərəh Əliyeva
Azərbaycanm maarifçilik ənənələri
kontekstində Niyazinin fəaliyyətindən söhbət açaraq
maesrtonun musiqimizin inkişafı, gənc istedadların üzə
çıxması
və s. aid gördüyü işlərdən danışdı. Azərbaycan Dövlət Musiqi Mədəniyyəti Muzeyinin
direktoru Alla Bayramova isə Niyazinin yaradıcılıq irsinin
təbliği məsələlərinə dair mühazirə
ilə çıxış etdi. O, Niyazinin
yaradıcılığına aid indiyədək məlum
olmayan bəzi məqamlara toxundu. Daha sonra
çıxış edən BMA-nın professoru, sənətşünaslıq
namizədi Şəhla Mahmudova, bəstəkar musiqişünas
Nərgiz Şəfiyeva, Azərbaycan Bəstəkarlar
İttifaqı İdarə Heyətinin Katibi, Əməkdar
İncəsənət xadimi, professor Ramiz Zöhrabov,
sənətşünaslıq namizədi, dosent Tamilla
Hüseynova Niyazi haqqında maraqlı xatirələri və
bəstəkarlarla görüşləri ilə
dinləyicilərlə bölüşdülər.
Sənətşünaslıq doktoru, professor Şirin
Məlikova bəstəkarın "Rast" simfonik
muğamı barəsində geniş məruzə ilə
çıxış etdi. Konfrans musiqişünas Aytən
Tağızadə, sənətşünaslıq namizədi
dosent Akif Quliyev və Sürəyya Ağayevanın Niyazinin
yaradıcılığına dair məruzələri ilə
sona çatdı. Bundan əlavə konfransda Xuraman Qasımava
Əməkdar incəsənət xadimi Ülviyyə
Hacıbəyovanın müşayiəti altında Niyazinin
"Arzu" mahnı romansını oxudu, "Etüd"
və "Çitra" baletindən bir parça ifa olundu.
Beləliklə, dahi musiqiçi maestro Niyazinin
xatirəsinə həsr olunmuş konfrans başa
çatdı. Biz ümid edirik ki, belə tədbirlər
gələcəkdə də keçiriləcək və
ənənə halını alacaq. Çünki nə
qədər kədərli olsa da etiraf etmək lazımdır
ki bu, Niyazi kimi dahi şəxsiyyətə həsr olunmuş
ilk tədbirdir. Belə tədbirlərin mütəmadi olaraq
keçirilməsi ilk növbədə gələcək
nəsl musiqiçiləri üçün çox vacibdir.
Bu cür şəxsiyyətlər gənc
musiqiçilərin musiqi zövqünün
formalaşması, onlarda milli köklərimizə
marağın oyanması, gələcəyin professional
musiqiçiləri olmaları üçün böyük
bir məktəbdir.
İmpuls.- 2007.- 9-14 noyabr.- S. 13.