Prezidentin sərəncamları ilə təltif olunmuş mədəniyyət və incəsənət işçilərinə orden və fəxri adların təqdimatı mərasimi keçirilmişdir

 

AzərTAc xəbər verir ki, noyabrın 6-da Mədəniyyət və Turizm Nazirliyinin təşkilatçılığı ilə Muzey Mərkəzində Azərbaycan Prezidenti İlham Əliyevin sərəncamları ilə təltif olunmuş mədəniyyət və incəsənət işçilərinə orden və fəxri adların təqdimatı mərasimi keçirilmişdir.
Mükafat alanları ölkəmizin Prezidenti adından təbrik edən mədəniyyət və turizm naziri Əbülfəs Qarayev son il yarımda mədəniyyət sahəsində görülən işlər, həyata keçirilən tədbirlər barədə ətraflı məlumat vermişdir. Nazir bildirmişdir ki, mədəniyyət və incəsənət işçilərinə ulu öndərimiz Heydər Əliyevin diqqət və qayğı ənənələrini bu gün Prezident İlham Əliyev uğurla davam etdirir. Ölkəmizdə yeni mədəniyyət ocaqları tikilir, mövcud olanlar əsaslı təmir edilir. Natiq vurğulamışdır ki, Azərbaycan Prezidenti təkcə son il yarımda ölkəmizdə mədəniyyət və incəsənətin inkişafı ilə bağlı 50-yə yaxın sərəncam imzalamışdır.
Prezidentin 4 illik uğurlu fəaliyyətindən danışan nazir diqqətə çatdırmışdır ki, ötən dövrdə ölkəmiz dünya miqyasında təkcə iqtisadiyyatı ilə deyil, həm də mədəniyyəti ilə yaxşı mənada tanınmışdır. Ümumi daxili məhsulun həcminə görə dünyanın qabaqcıl dövlətləri sırasında xüsusi mövqe tutan ölkəmiz mədəniyyətimizin, mənəvi dəyərlərimizin təbliğində də yüksək fəallıq göstərmişdir. Ə.Qarayev Qobustan Dövlət Tarixi-Bədii Qoruğunun Dünya Mədəni İrsi Siyahısına salınmasını buna əyani sübut kimi göstərmişdir. Natiq respublikamızda mədəniyyət işçilərinə göstərilən diqqətin nəticəsi olaraq 2008-ci ildə keçiriləcək prezident seçkilərində onların yekdilliklə İlham Əliyevə səs verəcəklərinə inamını ifadə etmişdir.
Tədbirdə nazir "Şöhrət" ordeni, "Xalq artisti", "Əməkdar incəsənət xadimi", "Əməkdar artist", "Əməkdar mədəniyyət işçisi" fəxri adlarının sənədlərini sahiblərinə təqdim etmişdir.
Fəxri ad alanlar əməklərinə verilən yüksək qiymətə görə Prezident İlham Əliyevə minnətdarlıqlarını bildirmiş, Azərbaycan mədəniyyətinin inkişafı və onun beynəlxalq aləmdə təbliği istiqamətində bundan sonra da yüksək fədakarlıqla çalışacaqlarına söz vermişlər.

 

Azərbaycan.- 2007.- 7 noyabr.- S. 5.