Səlimqızı C.

Nazirliyin saytı açıldı

Əbülfəs Qarayev: “Sayt mədəniyyət, incəsənət, turizm sahəsi ilə maraqlananlar ücün əhəmiyyətli olacaq”

Artıq mədəniyyət və turizm sahəsində hər hansı bilgini əldə etmək üçün “dağa-daşa” düşməyəcəksiniz. Çünki Mədəniyyət və Turizm Nazirliyi artıq özünün rəsmi İnternet portalını yaradıb.

Dünən tanınmış mədəniyyət və incəsənət xadimləri, eləcə də media mənsublarının iştirakı ilə Muzey Mərkəzində saytın təqdimat mərasimi keçirildi. Əvvəlcə Mədəniyyət və Turizm naziri Əbülfəs Qarayev sayt barədə ətraflı bilgi verdi. Qeyd etdi ki, sivil cəmiyyətdə İnternet çox önəmli yer tutur və insanlar ondan yetərincə bəhrələnməyə çalışmalıdırlar. Daha sonra sayt barədə danışdı. Bildirdi ki, yüksək səviyyədə tərtib olunmuş sayt mədəniyyət, incəsənət, turizm sahəsi ilə maraqlanan insanlar üçün böyük maraq və əhəmiyyət kəsb edəcək. Sonra saytın bölümləri barədə məlumat verildi.

Məlumat üçün bildirək ki, www.mct.gov.az adlı saytı 8 bölümdən ibarətdir; «Nazirlik haqqında», «Mədəniyyət və incəsənət», «Turizm», «Mətbuat», «Layihələr və tender», «Tədbirlər», «Afişa», «Mediateka». Qeyd edək ki, hər bölüm özlüyündə bir neçə sahələri əhatə edir. Məsələn, «Nazirlik» bölümündə nazirliyin müxtəlif şöbələri, əməkdaşları, görülən işlər, bağlanan müqavilələr və s. barədə dəqiq, yığcam informasiyalar verilir. Bölüm özlüyündə «struktur», «ictimaiyyətlə iş», «sənədlər», «xəbərlər», «qəbul» bölmələrinə ayrılır. Saytdan nazirin qəbulu ilə bağlı da məlumat almaq olar. «Mədəniyyət və incəsənət» bölümü özlüyündə «kitabxana», «muzeylər», «teatrlar», «kino», «abidələr», «yaradıcılıq», «təsviri sənət», «rəssamlıq», «mətbəx», «adət-ənənələr», «milli geyimlər» və digər sahələri əhatə edir. Burada mətbəx mədəniyyəti ilə tanış olacaq, milli xörəklərimizin çeşidləri barədə məlumatlanacaq, xalqımızın toy, nişan mərasimləri, qədim geyim nümunələrimiz və s. barədə bilgilər əldə edəcəksiniz. Onu da qeyd edək ki, hədsiz səliqə-sahmanı ilə seçilən bölümlərdə diqqətdən heç nə yayınmayıb. Bütün məlumatlar təfərrüatı ilə saytda yer ahb.

Məsələn, «Turizm» bölümünə daxil olub biləcəksiniz ki, Azərbaycanda turizmin inkişafı hansı səviyyədədir. Yaxud hansı bölgələrimizdə turizm obyektləri - istirahət məkanları yerləşir. Burada turizm marşrutları, turistlər üçün bələdçilər barədə də bilgilər yerləşdirilib. Həmçinin, bölüm vasitəsilə Azərbaycanın fauna və florasının zənginliyindən xəbər tutacaqsınız.

«Afişa» bölümünə daxil olub, paytaxtda fəaliyyət göstərən teatrlarda göstəriləcək tamaşaların siyahısı ilə tanış olacaqsınız. Teatrsevərlər, həmçinin, həmin teatrların tarixi barədə məlumat əldə edəcək, göstərdikləri tamaşalardan görüntüləri seyr edəcəklər. Daha hansısa bir teatrda istədiyiniz tamaşaya baxmaq və bilet əldə etmək üçün ora-bura telefon açmaq məcburiyyətində qalmayacaqsınız. «Layihələr və tenderlər» bölümündə Nazirliyin rəsmən təsdiqlədiyi layihələr və sənədlər haqqında informasiyalardan xəbər tutacaqsınız. Onu da öyrəndik ki, sayt dəb xarakteri daşımayacaq. Yəni, bəzi dövlət qurumlarının saytları kimi boyat xəbərlərdən ibarət olmayacaq. Vaxtaşırı yeniləşəcək və maraqlı xəbərlərlə mədəniyyətsevərləri sevindirəcək.

Mərkəz.- 2007.- 9 noyabr.- S. 11.