Ramiz və Əyyub Quliyevlər Novosibirskdə konsert verib

Xalq artisti Ramiz Quliyev oğlu, dirijor Əyyub Quliyevlə birgə Novosibirskdə konsert proqramı ilə çıxış edib. Bu barədə APA-ya məlumat verən Ə.Quliyev konsertin uğurla baş tutduğunu deyib. Onun sözlərinə görə, Novosibirskdə tar ilk dəfə olaraq səslənib. Konsertin Novosibirsk Dövlət Filarmoniyasında keçirildiyini bildirən Ə.Quliyev həmin gecədə Novosibirsk Filarmoniyasının Orkestrinin də iştirak etdiyini bildirib. Konsertin "V ritme tansa" ("Rəqs ritmində") adı altında keçirildiyini deyən dirijor I hissədə dünya bəstəkarlarından - Dvorjak, Straus, Bize, Prokofyev, Borodin, Musorqski və başqalarının əsərləri ifa olunduğunu deyib. II hissədən öncə rusiyalı musiqişünas Marina Yakuşeviç səhnəyə çıxaraq, Azərbaycan musiqi mədəniyyəti, onun tarixi və Ramiz Quliyevin yaradıcılığı haqda dinləyicilərə geniş məlumat verib. II hissədə isə Ramiz Quliyev Novosibirsk Filarmonik Orkestri ilə birgə Azərbaycan və Qərb bəstəkarlarının ən məşhur əsərlərini ifa edib. Proqrama F. Əmirov, A. Əlizadə, H. Rzayev, A. Rzayev, Şubert, Rossini, Motsart, Brams, Rubinşteyn və digər bəstəkarların əsərləri daxil edilib. Anşlaqla baş tutan konsertin sonunda dinləyicilər ata və oğlu yenidən səhnəyə dəvət ediblər. Ə.Quliyevin sözlərinə görə, tarzən proqramın yarısını təkrar ifa edib.
Noyabrın 18-dən 25-dək isə Ramiz və Əyyub Quliyevlər Podlaziya (Polşa) Dövlət Opera və Filarmoniyasının dəvəti və təşkilatçılığı ilə Polşaya səfər edəcəklər. Noyabrın 22-23-də isə Belostok şəhərində Podlaziya Filarmonik orkestri ilə konsert keçiriləcək. Orkestrə dirijorluq etmək Əyyub Quliyevə həvalə olunub. Ə.Quliyev bildirib ki, həmin konsertlərdə ilk dəfə olaraq Polşada Azərbaycan klassik musiqisi, milli bəstəkarlarımızın əsərləri ifa olunacaq və milli alətimiz olan tar ilk dəfə olaraq səslənəcək. Konsertdən öncə Podlaziya Dövlət Filarmoniyasında Polşanın tanınmış musiqişünasları tərəfindən "Azərbaycan musiqi mədəniyyəti, onun inkişafı və Azərbaycan milli aləti-tar" adlı məruzə oxunacaq. Konsert proqramında isə görkəmli Azərbaycan bəstəkarları H.Xanməmmədov, H.Rzayevin tar üçün yazılmış iri həcmli əsərləri, eyni zamanda R.Straus, P. Çaykovski və M.Oginskinin simfonik əsərləri ifa olunacaq.

Xalq cəbhəsi.- 2007.- 17 noyabr.- S. 14.