Salmanov R.

“Mailin ünvanı vətəndir...”

Muğamsevər tamaşaçıların böyük maraqla izlədikləri "Muğam-2007" televiziya müsabiqəsinin Hacı Mail qəzəllərinə həsr olunmuş növbəti həftəsi başa çatdı. Müsabiqə haqqında yazımızda muğam televiziya müsabiqəsinə dünyanın bir çox ölkələrində yaşayan soydaşlarımızın böyük maraq göstərdiyindən və bu səbəbdən Azərbaycan televiziyasının, eləcə də redaksiyamızın ünvanına gələn minnətdarlıq dolu məktub və teleqramlardan söz açmışdıq. Klassik muğam irsimizə, televiziya müsabiqəsinə olan marağı nəzərə alan Azərbaycan Televiziyası ilk öncə özünün internet saytını və peyk vasitəsilə verilişlərin izlənməsi üçün kordinatlarını, eləcə də müsabiqənin elektron ünvanını muğamsevər xalqın diqqətinə çatdırdı.
Respublikanın xalq artisti mərhum Əbülfət Əliyev bir vaxtlar demişdir.

- “Mən istəyirəm indi baxçaya gedən körpə balalarımız muğamı sevsin. Böyüyəndə onu başa düşsün. Arxiv malı olmasın muğam”. Bəşər musiqisinin tacı sayılan muğamata heç vaxt bugünkü qədər həssas münasibət və qayğı göstərilməyib. Ustad xanəndə Əbülfət Əliyevin dedikləri artıq həyata keçir. Muğam – 2005, 2007 televiziya müsabiqələri neçə-neçə gənc istedadı üzə çıxardı. Pərvaz İbrahimli, Elməddin İbrahimov kimi kiçik yaşlı istedadların özlərindən xeyli böyüklərlə müsabiqəyə qatılması Əbülfət Əliyevin vaxtilə arzu etdiyi günlərin gəlib çatdığından xəbər verir. Bunun üçün ilk növbədə gələcəyimiz naminə bu gözəl şəraitin yaradılmasına dəstək olan mədəniyyətimizin hamisi Heydər Əliyev Fondunun prezidenti, YUNESKO və İSESKO-nun xoşməramlı səfiri millət vəkili Mehriban xanım Əliyevaya, gənclərimizə bu sevinci bəxş edən müsabiqə layihəsinin müəllifi – Azərbaycan Mədəniyyətinin Dostları Fonduna (AMDF) və bu işdə yaxından köməklik edən Mədəniyyət və Turizm Nazirliyinə minnətdar olmalıyıq.
Muasir poeziyamızda öz sözü və dəst-xətti ilə seçilən Hacı Mail dahi Füzuli irsinə böyük maraq göstərmişdir. Füzuli irsini dərindən tədqiq edən, elmi əsərlər yazan Hacı Mail bir şair kimi qəzəl janrında da öz qüvvəsini sınayaraq gözəl nümunələr yaradıb. Bu gün də qəzəlləri oxunursa, xalq tərəfindən sevilirsə, demək şair yaşayır.
Ötən müsabiqə həftələrində olduğu kimi bu həftənin də yaddaqalan bir çox anları oldu. Güllü Muradovanın son dərəcə uğurlu çıxışını qeyd etmək lazımdır. Onun oxuduğu “Zabul-segah” o gecə təkcə münsiflər heyətinin deyil, zalda əyləşən və bu müsabiqəni canlı olaraq izləyən tamaşaçıların sürəkli alqışlarından da görmək oldu. Bu gözəl ifadan doymadıq – deyən münsiflər heyətinin üzvü televiziya müsabiqəsinin təşkilatçısı, əməkdar incəsənət xadimi Nadir Axundov bu alqışları nəzərə alaraq Güllü Muradovanın bir daha oxumasını xahiş etdi. Bu həftə iştirak edə bilməyən münsiflər - xalq artistləri Əlibaba Məmmədov, Ağaxan Abdullayev, Mənsum İbrahimov, eləcə də Azərbaycan Mədəniyyətinin Dostları Fondunun icraçı direktoru İbrahim Quliyev də yəqin ki, həmişə olduğu kimi, Güllünün bu çıxışına da həmkarları kimi ən yüksək bal verərdilər. Digər yaddaqalan məqam da iki iddiaçının Rəna Qafarova və Qızılgül Babayevanın münsiflər tərəfindən eyni miqdarda bal almasıdır. Müsabiqənin şərtlərinə görə, belə olduqda sonda hər iki iddiaçıya yenidən müsabiqədə qalıb-qalmaması şansı verildi. Və bu yarışmada Rəna Qafarova az xal toplayaraq müsabiqəni tərk etməli oldu. Yarışı isə həqiqi istedad sahibləri zəhmətdən çəkinməyən, daim öz üzərində çalışan, ustad sözündən faydalananlar davam etdirməli olacaqlar. Həftənin qalibləri Aida Əliyeva – I, Nişanə Baxışova – II, Elməddin İbrahimov – III, Ehtiram Hüseynov – IV, Vüsal Zamanov – V, Nasir Ətapur – VI, Abgül Mirzəyev – VII, Güllü Muradova – VIII yeri tutdular. Televiziya müsabiqəsinin Şəhriyar qəzəllərinə həsr olunmuş növbəti həftəsi noyabrın 20-si və 22-də olacaqdır. Söz verdiyimiz kimi, tamaşaçıların bəzi rəylərini sizlərə çatdırırıq.
Semyon İxiilov, Azərbaycan Dağ yəhudiləri icmasının sədri:
- Azərbaycan dünya miqyasında bəlkə də yeganə dövlətdir ki, öz toletrantlığı, qonaqpərvərliyi, adət və ənənəsi, eləcə də incəsənətilə seçilib tanınır. Tolerantlıq təkcə çoxmillətlilik deyil, həm də ölkədə yaşayan bütün millətlərin adət və ənənəsinə, mədəniyyətinə olan doğma münasibətdir. Bu gün məni bu müsabiqəyə gətirən də ulu muğam sənətinə olan doğma münasibətimdir. Mənim atam, babam Azərbaycanda doğulub boya-başa çatıblar. Bir-iki dəfə bu verilişdə iştirak etməyimlə dünyanın hər yerindən bu müsabiqənin maraqla izləndiyinin şahidi oldum. Bunu mənə edilən telefon zənglərindən bildim. müsabiqədə çoxlu gənc istedadlar gördüm. Sevinirəm ki, nə vaxtsa bu gənclərimiz böyüyüb tanınmış incəsənət xadimləri olanda mən də bu günü xoş xatirə tək yad edəcəyəm. Gənclərimizə bu gözəl şəraiti yaratdığına görə ilk növbədə çox hörmətli millət vəkili Mehriban xanım Əliyevaya, televiziya müsabiqəsinin təşkilatçısı Nadir Axundova öz dərin minnətdarlığımı bildirirəm.
Kamil Cəlilov, xalq artisti:
- Sevindirici haldır ki, çoxsaylı şou proqramların bolluğuna baxmayaraq, bu gün ulu muğam sənətinə maraq günü-gündən artmaqdadır. Klassik muğam proqramına xalqımızda hər bir zaman maraq olub. Lakin heç vaxt bugünkü qədər incəsənətimizə dövlət səviyyəsində qayğı və diqqət göstərilməyib. Bunun üçün ilk növbədə ölkəmizin başçısı, möhtərəm Prezidentimiz İlham Əliyevə, mədəniyyətimizin hamisi Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevaya, bu gözəl layihənin müəllifi Azərbaycan Mədəniyyətinin Dostları Fonduna, eləcə də onu bütün dünyaya çatdıran AzTV rəhbərliyinə, televiziya müsabiqəsinin təşkilatçısı Nadir Axundova öz dərin təşəkkürümü bildirirəm.

Xalq qəzeti.- 2007.- 18 noyabr.- S. 7.