Vokalçıların Bülbül adına IV beynəlxalq müsabiqəsi

Yarışma Bülbülün 100 illlyinə həsr olunub

Noyabrın 26-dan dekabrın 6-dək Bakıda vokalçıların Bülbül adına IV beynəlxalq müsabiqəsi keçiriləcək. Mədəniyyət və Turizm Nazirliyinin təşkilatçılığı ilə baş tutacaq yarışma böyük müğənni və pedaqoqun 110 illik yubileyinə həsr olunur.

Mədəniyyət və Turizm Nazirliyinin mətbuat xidmətinin məlumatına görə, münsiflər heyətinə Beynəlxalq Musiqi Xadimləri İttifaqının prezidenti, SSRİ xalq artisti İrina Arxipova başçılıq edəcək. Təşkilat komitəsinə nazir Əbülfəs Qarayev sədrlik edir. Müsabiqə iştirakçıları 4 mükafat, Qran-pri və xüsusi mükafatlar uğrunda mübarizə aparacaqlar. Ən yaxşı konsertmeyster üçün üç mükafat təsis olunub.

Müsabiqənin şərtlərinə görə, birinci mərhələdə XVII-XVIII əsrlərə aid kantata, opera və ya oratoriyadan ariya, XIX-XX əsr Qərbi Avropa bəstəkarının operasından böyük ariya, iştirakçının mənsub olduğu ölkənin xalq mahnısı səslənəcək.

Müsabiqənin ikinci mərhələsində iştirakçılar operadan böyük ariya (öz seçimi ilə), XIX əsr Qərbi Avropa və ya rus bəstəkarının romansını, XX əsr bəstəkarının əsərini (opera, kantata və oratoriyadan ariya), Bülbülün repertuarından Üzeyir Hacıbəyovun "Sənsiz" və "Sevgili canan" romanslarını, Asəf Zeynallının "Ölkəm", Fikrət Əmirovun "Ulduz" romanslarını ifa edəcəklər. Sonuncu mərhələdə müsabiqə iştirakçıları simfonik orkestrin müşayiəti ilə operadan iki ariya oxuyacaqlar. Püşkatma müsabiqənin açılışı günü noyabrın 26-da keçiriləcək.

Gün.- 2007.- 9 noyabr.- S. 14.