Qara Qarayev haqqında Türkiyə
mətbuatında geniş məqalə dərc edilib
Bu günlərdə Yeni Azərbaycan
Yardımlaşma və Kültür Dərnəyinin
rəhbəri, professor Əflatun Nemətzadənin
Türkiyənin "İl qazetesi"ndə bəstəkar
Qara Qarayevin həyat və yaradıcılığından
bəhs edən məqaləsi dərc olunub. Müəllif XX
yüzillikdə klassik musiqi yaradıcılığında
Qara Qarayevin yeni bir ənənənin əsasını
qoyduğunu bildirərək onun milli musiqi
ənənələrimizi bütün dünyaya
tanıtdığını qeyd edir: "Qara Qarayevin
qələmə aldığı əsərlər ABŞ,
Yaponiya, Avstriya, Almaniya və başqa ölkələrdə
simfonik orkestrin müşayiətilə səsləndirilib.
Onun simfonik əsərləri, baletləri bomba kimi partladı
və Sovetlər İttifaqının hər
tərəfində elə böyük maraqla
qarşılandı ki, hətta bu, o zamankı Siyasi Büronun
gündəminə gəldi. Bəstələdiyi
əsərlərdə "Qərb ruhunu ifadə etdiyi"
mübahisə mövzusuna çevrildiyi üçün
bəstəkara cəza verilməsi də müzakirə
mövzusu oldu. O zamanın "Pravda",
"İzvestiya", "Sovetskaya kultura" kimi
məşhur qəzetləri Azərbaycanın dahi
bəstəkarını haqsız yerə tənqid
etməyə başladı. Olay getdikcə böyüdü
və Siyasi Büronun gündəminə gəlib
çıxandan sonra mərhum Heydər Əliyev Siyasi Büro
üzvlərinin qarşısına çıxdı və
Qarayevə dayaq oldu. Qərbdəki musiqiçilər də
Qarayevə sahib çıxdılar və onu Amerikaya
dəvət etdilər".
Daha sonra Q.Qarayevin uğurlarından
danışan müəllif bütün bunların həm
də böyük siyasi xadim Heydər Əliyevin
bəstəkara göstərdiyi qayğı və diqqətin
nəticəsi olduğunu vurğulayır.
Bəstəkarla öz
tanışlığından da söz açan Əflatun
Nemətzadə Q.Qarayevdən böyük diqqət
gördüyünü nəzərə çatdıraraq, bu
amilin irəli addımlamasında mühüm rol
oynadığını bildirir. Sonda müəllif qeyd edir ki,
Qara Qarayev Türk dünyasının böyük oğludur,
şərəfli övladıdır.
525-ci qəzet.- 2007.- 3 noyabr.- S. 24.