Cəvahir

Lirik mahnılar müəllifi

Emin Sabitoğlunun 70 yaşı tamam oldu. Dünən lirik mahnıların mahir bəstəçisi bəstəkar Emin Sabitoğlunun 70 yaşı tamam oldu. E.Sabitoğlu Azərbaycan musiqisinə xüsusi töhfəsi olan bəstəkarlardandır. Müğənnilərdən Flora Kərimova, Mirzə Babayevin ifasında sevə-sevə dinlənilən «Bağışla», «Taksi», «Payız gəldi, uçdu getdi quşlar», «Bir liman, bir də mən», «Bu dünyadan» və digər yüzlərlə mahnı indi də dillər əzbəridir. Bəstəkarın yaradıcılığı yalnız həzin mahnılarla kifayətlənmir. Bəstəkar, həmçinin, 25 bədii film üçün musiqilər yazıb: «Bizim Cəbiş müəllim», «Otel otağı», «Bəyin oğurlanması», «Ölsəm, bağışla», «Gün keçdi», «Atları yəhərləyin», «Təhminə», «Dədə Qorqud» və s. 2001-ci ildə dünyasını dəyişən bəstəkarın ömrünü son günləri Türkiyədə keçmişdi. Qeyd edək ki, yaxın günlərdə Dövlət Film Fondunda bəstəkarın xatirəsinə həsr olunmuş mərasim keçiriləcək. Bu barədə qəzetimizə fondun direktoru Cəmil Quliyev məlumat verib. Tanınmış mədəniyyət xadimlərinin qatılacağı mərasimdə bəstəkarın həyat və yaradıcılıq yolunu əksetdirən foto-sərgi nümayiş olunacaq. Həmçinin, bəstəkarın musiqi yazdığı bədii filmlərdən fraqmentlər göstəriləcək.

Mərkəz.- 2007.- 3 noyabr.- S. 11.