Ayxan

Firəngiz Əlizadənin yubileyi

Avropada qeyd olunur

Azərbaycanın tanınmış bəstəkarı, Bəsətəkarlar İttifaqının sədri, Xalq artisti Firəngiz Əlizadənin 60 illiyi Avropada qeyd olunur. Belə ki, bəstəkarın 60 illiyi münasibətilə bu günlərdə ölkəmizin Almaniyadakı səfirliyinin təşkilatçılığı ilə Berlində alman və azərbaycan musiqiçilərinin iştirakı ilə konsert keçirilib. Bəstəkarlar İttifaqının mətbuat xidmətindən verilən məlumata görə, tədbiri Azərbaycanın Almaniyadakı səfiri Pərviz Şahbazov açaraq Firəngiz Əlizadənin yaradıcılığı barədə iştirakçılara məlumat verib: "Firəngiz xanım müsəlman Şərqindən olan ilk qadın bəstəkardır ki, Qərb və Şərq musiqisinin sintezi formasında yaratdığı əsərləri ilə Qərb aləmində müasir klassik musiqi sahəsində özünü təsdiq edə bilib".

Berlinin mərkəzi Jandermarkt meydanında yerləşən məşhur "Konserthauz"da keçirilən konsertdə tanınmış professor Yulius Bergerin rəhbərliyi ilə Auqusburq violonçelistlər qrupu, Berlindən "Modern Art" ansamblı yə Köindən "Minguet" kvarteti bəstəkarın "Oazis", "Atəş", "Muğamsayağı" və "Metamorfozlar" əsərlərini ifa ediblər. Tanınmış musiqiçilər, xalq artistləri Möhlət Müslümov (tar), Fəxrəddin Dadaşov (kamança) da bu konsertdə iştirak ediblər. Azərbaycan Dövlət Simfonik Orkestri və Dövlət Xalq Alətləri Orkestrinin solistləri Firəngiz xanımın dirijorluğu və fortepianoda müşayiəti ilə bəstəkarın "Crossings" əsərini səsləndirib.

Azərbaycan Mədəniyyət və Turizm Nazirliyi, Almaniya-Azərbaycan Forumu və "RWE Gas" şirkətinin dəstəyi ilə keçirilən konsertdə Almaniya hökumətinin və Bundestaqının, o cümlədən Almaniyada akkreditə olunmuş diplomatik korpusun, Berlinin elm, iqtisadiyyat və mədəniyyət dairələrinin nümayəndələri konsertdə iştirak edib. Konsert münasibəti ilə Firəngiz xanımın yaradıcılığına və Azərbaycan musiqi mədəniyyətinə həsr edilmiş broşür nəşr edilib.

Ekspress.- 2007.- 3-5 noyabr.- S. 16.